2025 йилда хорижий инвестиция ва кредитлар 33,5 млрд долларга етди

Миллий статистика қўмитаси қайд этишича, 2025 йилда асосий капиталга киритилган инвестициялар ҳажми 591,1 трлн сўмни ташкил этди. Мазкур ўсиш иқтисодиёт ва ижтимоий соҳадаги янги лойиҳалар ҳамда инфратузилма йўналишларидаги ишлар фаоллиги билан изоҳланади.

Шу даврда янги асосий фондларни яратишга қаратилган асосий капиталга хорижий инвестиция ва кредитлар ҳажми 33,5 млрд АҚШ доллари ёки 422,1 трлн сўм бўлган. Бу, умумий инвестициялар ҳажмига нисбатан, тахминан 71,4 фоиз улушни ташкил этади.

Иқтисодий фаолият турлари бўйича асосий капиталга хорижий инвестиция ва кредитлар тақсимоти қуйидагича:

• ишлаб чиқариш саноати — 33,2 фоиз;
• электр, газ билан таъминлаш — 17,1 фоиз;
• тоғ-кон саноати — 11,9 фоиз;
• қишлоқ хўжалиги — 9,2 фоиз;
• қурилиш — 6,1 фоиз;
• ташиш ва сақлаш — 5,3 фоиз;
• сув билан таъминлаш ва канализация — 2,1 фоиз;
• соғлиқни сақлаш — 1,7 фоиз;
• ахборот ва алоқа — 1,5 фоиз;
• бошқа фаолият турлари — 11,9 фоиз.

Аҳамиятли жиҳати, хорижий маблағлар асосан ишлаб чиқариш саноати ҳамда энергетика (электр ва газ таъминоти) йўналишларига тўғри келмоқда.