АҚШ расман Париж иқлим келишувидан чиқди

АҚШ расман Париж иқлим келишувидан чиқди, бу президент Доналд Трамп маъмуриятининг иқлим ўзгаришига қарши кураш бўйича халқаро саъй-ҳаракатлардан воз кечишини англатади.

БМТ Иқлим ўзгариши бўйича доиравий конвенцияси котибиятининг хабар беришича, чиқиш тўғрисидаги қарор 27 январ куни, Қўшма Штатлар тегишли билдиришномани Бирлашган Миллатлар Ташкилотига юборганидан роппа-роса бир йил ўтгач кучга кирди.

Трамп 2025 йил январ ойида ўз инаугурацияси куни келишувдан чиқиш тўғрисидаги фармонни имзолаган эди.

Париж келишуви - 200 га яқин давлат томонидан қабул қилинган халқаро иқлим шартномаси бўлиб, унинг мақсади глобал исишни саноатдан олдинги кўрсаткичдан 2 даража пастга чеклаш ва 1,5 даражага интилишдир. АҚШ чиқиб кетгандан сўнг, мамлакат энди келишувни, жумладан, иссиқхона газлари чиқиндиларини камайтириш ва халқаро иқлим учрашувларида иштирок этиш мажбуриятларини бажармайди. Бу қадам иқлим ўзгаришига қарши кураш бўйича халқаро саъй-ҳаракатларни заифлаштириши мумкин, чунки АҚШ иссиқхона газларининг энг йирик эмитентларидан бири ва иқлим ташаббусларини молиялаштиришнинг муҳим иштирокчиси эди.

АҚШ иссиқхона газлари эмиссияси бўйича дунёда Хитойдан кейин иккинчи ўринда туради. БМТ ҳисоб-китобларига кўра, ҳозирги глобал иқлим сиёсати сақланиб қолган тақдирда, аср охирига бориб сайёрадаги ўртача ҳарорат саноатдан олдинги даражадан тахминан 2,8 даражага кўтарилади. Қўшма Штатларнинг келишувдан чиқиши бу кўрсаткични тахминан 0,1 даражага оширади.

АҚШ тарихда иккинчи марта Париж келишувидан чиқмоқда. Биринчиси Трампнинг илк президентлик даврида юз берган, бироқ Жо Байден маъмурияти унга яна қўшилган эди.

Чиқиш экологлар ва жаҳон ҳамжамияти томонидан танқидга учради, уларнинг фикрича, бу чиқиндиларни жамоавий равишда камайтириш ва иқлим инқирозига қарши курашишни қийинлаштириши мумкин. Шунга қарамай, кўплаб бошқа давлатлар келишувда қолмоқда ва иқлим бўйича ўз мажбуриятларини давом эттирмоқда.