Мексика чегарасида тўқнашув: одам контрабандасида гумонланувчи яраланди

АҚШнинг Аризона штатида одам контрабандасида гумон қилинаётган эркак ва АҚШ чегара хизмати ходимлари ўртасидаги отишма Доналд Трамп маъмурияти иммиграция қонунчилигига риоя этилишини кескин кучайтирган пайтда содир бўлди.

Фото: Mike Blake/REUTERS

Одам контрабандасида гумон қилинаётган, Аризона штатида яшовчи 34 ёшли шахс сешанба, 27 январ куни АҚШ чегара хизмати ходимлари билан отишма пайтида оғир яраланди. Associated Press агентлиги АҚШ Федерал тергов бюроси (ФТБ)га таяниб хабар қилишича, уни ушлашга уриниш жараёнида эркак Аривака қишлоғи яқинида — бу жой АҚШ–Мексика чегарасидан 16 километр масофада жойлашган — чегара хизмати вертолёти томон ўқ узган.

Яраланган шахс шифохонага етказилган. ФТБ “федерал ходимга эҳтимолий ҳужум” бўйича тергов бошлади. ФТБнинг махсус агенти Хейт Жанке гумонланувчининг исми Патрик Гэри Шлегел эканини маълум қилди. Унинг жиноий ўтмиши бор. 2025 йилда Шлегелга нисбатан қочиб кетиш ҳолати бўйича (одам контрабандаси иши юзасидан чиқарилган ҳукмга боғлиқ) ҳибсга олиш ордери берилган.

Аризонадаги Пима округи шерифи Крис Нанос аввалроқ унинг идораси президент Доналд Трампнинг кескин сиёсати шароитида федерал иммиграция қонунчилиги ижросини таъминламаслиги, чекланган ресурсларни эса маҳаллий жиноятчиликка қарши курашга йўналтиришини айтган.

Аризонадаги отишма Миннесота штатида федерал иммиграция ва чегара идоралари ҳаракатларига жамоатчилик эътибори кучайган бир пайтда рўй берди. 24 январ куни федерал агентлар Миннеаполис кўчасида Ветеранлар шифохонасининг жонлантириш (реанимация) бўлимида ишлаган 37 ёшли ҳамшира Алекс Преттини отиб ўлдирган. АҚШ ҳукумат органлари отишма ўзини ҳимоя қилиш мақсадида бўлганини айтган, аммо эълон қилинган видеолавҳалар бу версияга нисбатан шубҳалар уйғотмоқда.

Преттининг ўлими Иммиграция ва божхона назорати хизмати (ICE) агенти 37 ёшли Рене Гудни отиб ўлдирганидан кейин уч ҳафта ҳам ўтмай содир бўлди. Трамп маъмурияти Гудни “террорист” деб атаган ва уни отган ICE ходими, гўё у ходимни “машина билан уриб кетиш”га урингани сабабли, ўзини ҳимоя қилиш тартибида ҳаракат қилганини таъкидлаган.