«Жуда кўп бола эвакуация қилинди» – Aviator’дан репортаж

Ёнғин асосан 2-қаватда, болалар ўйингоҳида юз берган. Одамлар саросимада тартибсиз ҳаракат қилишган, кўпчилик ташқарига отилган, ота-оналар эса фарзандларини қутқариш учун ўзини ичкарига урган. Kun.uz воқеа жойидан тайёрлаган репортажда ФВВ вакили қутқарув амалиёти тафсилотларини айтиб берди.

31 январ куни Тошкент шаҳри Яшнобод тумани Паркент кўчасида жойлашган Aviator савдо-кўнгилочар марказида йирик ёнғин содир бўлди.

Ёнғин умумий овқатланиш шохобчалари ва болалар майдончаси жойлашган иккинчи қаватда чиқиб, атрофга тарқалган. Олов тахминан 800 квадрат метр майдонни қамраб олган. Ёнғинни ўчириш ишларига 12 та асосий ва 4 та махсус техника ҳамда 6 та сув ташувчи техника жалб этилган.

Дам олиш куни бўлгани сабабли бу ерга кўплаб оилалар ёш фарзандлари билан келганди.

Ёнғин ўчирилганидан кейин болалар ўйингоҳида 3 ёшли боланинг жасади топилди.

Тошкент шаҳар Фавқулодда вазиятлар бош бошқармаси ахборот хизмати бошлиғи Зуҳриддин Қурбонов журналистларга ҳодиса тафсилотлари ҳақида айтиб берди. Қайд этилишича, ичкаридан жуда кўп ёш болалар олиб чиқилган.

Ҳодиса ҳақида хабар берилганда қутқарув техникалари зудлик билан воқеа жойига жўнаб кетган. Дастлабки қутқарув техникалари етиб келганда вазият тартибсиз ҳолатда бўлган.

«Айрим фуқаролар ичкарига кираётган, айримлар ташқарига чиқаётган, тартибсизлик юзага келаётганди. Шундай шароитда қутқарувчилар қутқарув ва эвакуация ишларига киришди.

Пастки қаватдаги фуқаролар юқорига чиқиб олганди, лекин юқори қаватдаги вазият хавфли эди, у ердаги ёш болалар ўйингоҳида болалар жуда кўп эди – иккинчи қаватда 120 дан ортиқ фуқаролар бор эди.

Биринчи навбатда, ходимларнинг барчаси шу фуқароларни эвакуация қилишга жалб этилди. Фарзандлари ичкарида қолиб кетгани сабабли айрим ота-оналар ичкарига киришга уринарди. Тартибсизлик юзага келганди.

Ички ишлар вазирлигидан ёрдам чақирилди ва қутқарувчилар деярли барча фуқароларни ва ичкарида қолиб кетган болакайларни қутқариб олиб чиқишга эришди. Афсуски, ёнғин ўчириб бўлинганидан сўнг, ичкарида 2023 йилда туғилган бир болакайнинг жасади топилди. У ҳам шу болалар ўйингоҳида бўлган», – дейди у.

Ҳозирда ички ишлар вазирлиги ва прокуратура органлари томонидан терговга қадар суриштирувлар, хусусан, ёнғин нимадан келиб чиққани бўйича ўрганишлар олиб борилмоқда.

«Айнан қайси нуқтада [ёнғин чиққани] аниқ эмас, лекин келиб чиқиш сабаби том қисмида бўлган – ёнғин иккинчи қаватнинг том қисмида бошланган. У ер аввалига тутун билан қопланган ва фуқаролар у ердан ташқарига чиқишган. Айрим фуқаролар саросимага тушиб қолган, шундай вазиятда ота-оналар ўз фарзандини олиб чиқиш учун ичкарига қараб ҳаракат қилган. Лекин қутқарувчиларимиз ичкарига кириб, барча болаларни олиб чиқиш учун эвакуация ишларини бошлаган.

Ҳар бир қутқарувчининг вазифаси инсонларни қутқариш, эвакуация қилишдир. Ўша вазиятда биринчи навбатда эвакуация ишлари амалга оширилган бўлиб, қутқарувчилар ўз ҳаётини хавф остига қўйган… Ижтимоий тармоқда тарқалган кадрларда қутқарувчиларнинг ўзи ҳам ёниб кетиши мумкин бўлгани ҳақида айтилган. Қутқарувчиларда профессионал қутқарув кийимлари бўлгани сабабли, уларга ҳеч қандай зарар етмаган. Қутқарувчиларнинг жанговар кийимларига зарар етган, лекин ҳеч қандай жиддий зарар ва жароҳатлар бўлмаган. Қутқарувчилар ўз вазифасини бажарган», – деди Қурбонов.

Қўшимча қилинишича, бинода ёнғинга қарши хавфсизликнинг барча тизимлари ўрнатилган бўлган. Яшнобод тумани Фавқулодда вазиятлар бошқармаси томонидан профилактик кўриклар ўтказилган, профилактик тавсиялар, яъни ёнғиннинг олдини олишга қаратилган ишлар билан тарғибот-ташвиқот ишлари олиб борилган.

Қурбоновнинг сўзларига кўра, айни вақтда видеокузатув мосламалари текширилмоқда, ёнғин айнан нимадан чиққани бўйича қўшимча маълумот берилади.