Эпштейн — Американинг «қора қутиси»

Охирги вақтларда Жефри Эпштейн деган одам ҳақида кўп эшитаётган бўлсангиз керак. Педофилликда айбланиб қамалган бу миллионер етти йил аввал Америка қамоқхонасида ўлган. Лекин охирги вақтларда у Американинг «қора қутиси» ўлароқ жуда кўп машҳур инсонларни жинсий зўравонлик гирдобига тортмоқда...

Ким бу монстр?

Қисқача Жефри Эпштейн ким экани ҳақида. 1953 йил Бруклиндаги яҳудийлар оиласида туғилган Жефри бир муддат ўқитувчилик қилиб кўради, бироқ мактабдан ҳайдалгач молия, банк тизимида ишлашга қарор қилади. Молиячиликда ҳам ниманидир қойиллатгани аниқ эмас, лекин Америкага тегишли Виржиния оролларида шахсий орол сотиб олиш учун етарли пул топа олган. Бу оролнинг номи ҳам бор, лекин уни Эпштейн ороли деб аташади.

Эпштейн бу оролдаги ҳашаматли вилласида фоҳишабозлик билан, хусусан, вояга етмаган қизларни жинсий зўрлаш билан шуғулланиб келган. Бугун бутун Американи оёққа турғизган Эпштейн ўзи авраган қизларга пул берган, қиммат совғалар билан алдаган, ўқиши учун пул тўлаган. Ва уларга ёш дугоналарини виллага келишга кўндириш эвазига пул таклиф қилган. Шу тариқа ўзига хос фоҳишабозлик пирамидасини яратган.

Эпштейн вилласига олиб борган аёллар сони мингдан ошади. Уларнинг аксари вояга етмаган қизлар эди. Миллионер узоқ йиллар вояга етмаганлар билан муаммосиз алоқа қилиб келган. Полиция 2005 йилдагина унинг устидан текширув бошлайди. Ўшанда Эпштейн жинсий алоқа қилган 14 ёшли қизнинг ота-онаси полицияга мурожаат қилади. Қизни сўроқ қилиш орқали полиция Эпштейн оролига олиб бориб жинсий зўравонликка учраган камида 36 нафар 14 ёшли қизларни аниқлайди.

Лекин полиция ишга жиддий қарамайди. Эпштейн атиги 13 ой қамоққа ҳукм қилинади, шунда ҳам бемалол озодликда ишини давом эттириш имкони берилган ҳолда. Яъни, ўша вақтдаёқ юзлаб болаларни жинсий майли учун ишлатган педофил Америка суди томонидан деярли жазосиз қолдирилади.

Молиячи яна 14 йил кайф-у сафода ҳаёт кечиради, унга ҳеч ким индамайди, оролига юзлаб вояга етмаган қизларни олиб бориб амалда уларни қул қилади. Ва 2019 йилга келиб Эпштейнни қамоққа олишади. Унга вояга етмаган болаларни жинсий экплуатация қилиш айблови қўйилади.

2019 йил июлда қамалган педофил икки ой ўтиб ўз камерасида ўлик ҳолатда топилади. Расмий хабарга кўра, Эпштейн камерада ўз жонига қасд қилган. Лекин бир гуруҳ суд-мед экспертлар Эпштейн ўзини осмаган деган версияни илгари суради. Ана шундан Эпштейн билан боғлиқ фитна назарияларига расман старт берилади. Америка жамиятида савол пайдо бўлади: бу миллионер педофил ким эдики уни қамоқхонада ўлдириб кетишса?!

Эпштейн мижозлари

Жефри Эпштейн оддий миллионер бўлса ҳам, Америкадаги жуда катта одамлар билан таниш бўлган. Улар орасида собиқ президентлар, бўлажак президентлар, дунёнинг энг бой одамлари, дунёдаги энг машҳур қўшиқчилар бор. Эпштейн уюштирган зиёфатлардан олинган суратларда Доналд Трамп, Майкл Жексон, Билл ва Ҳиллари Клинтон, Билл Гейтс каби машҳурларни учратиш мумкин.

Бу борада миш-мишлар кўпайиб кетганидан кейин америкаликлар Эпштейн иши бўйича барча ҳужжатлар ошкор этилишини талаб қила бошлади. Трамп сайловолди кампанияси вақтида барча ҳужжатларни эълон қилишга ваъда берганди.

Ҳозиргача умумий ҳисобда 6 миллион саҳифа ҳужжат, 2 мингта видео, 180 мингта расм эълон қилинди. Албатта, буларнинг барчаси аниқ маълумотлар эмас, гувоҳлар, қурбонларнинг кўрсатмалари, ишга бириктирилган фото ва видеолар, улар орасида катта эҳтимол уйдирмалар ҳам жуда кўп.

Лекин Америка Адлия вазирлиги ҳужжатларнинг жуда кўпини шунчаки устига қора тортиб эълон қилгани, баъзи ҳужжатлар ўчирилиб, кейин яна пайдо бўлгани, орада баъзи саҳифалар ташлаб кетилгани фитна назариясида илгари сурилган конспирологик фикрларга ишонувчилар сонини оширди.

Ана шу конспирологияларда Эпштейнда унинг оролида вояга етмаган қизлар билан кўришадиган «мижозлар рўйхати» бўлгани айтилади. Рўйхат ҳақида гап Эпштейн қамоқда ўлганидан кейин тарқалган, 2025 йил Трамп маъмуриятининг собиқ мулозими, дунёнинг энг бой одами Илон Маск Twitter'да пост ёзганидан кейин яна муҳокама марказига қайтганди.

Маск ўшанда президент Трамп ҳам Эпштейн файлларида борлиги, шу сабаб улар эълон қилинмаётганини айтганди. Миллиардер кейинчалик ўша постини ўчириб юборади. 30 январ куни Адлия вазирлиги Эпштейн файлларига алоқадор яна 3 миллион саҳифа ҳужжат эълон қилди. Уларда Трампнинг номи 3 минг мартадан кўпроқ тилга олинади. Яна такрорлайман, бу ҳужжатларнинг аксари шунчаки кўрсатмалар, аниқ фактлар эмас.

Лекин суд ҳужжатларида ҳам Трамп ҳақида жуда шов-шувли гаплар бор. Масалан, бир суд ҳужжатига кўра, Эпштейн Доу деган вояга етмаган қизни Флоридадаги ҳозир бутун дунё сиёсати ҳал қилинаётган Доналд Трампнинг вилласига олиб боради. Кейин Эпштейн 14 ёшли Доуни Трампга кўрсатиб «Яхшигина, а?», деб сўрайди. Трамп эса кулиб тасдиқлайди. Бу учрашув 1990-йилларда бўлган. Файлларда бунақа эпизодлар кўп.

Адлия вазирлиги барча ҳужжатлар эълон қилингани, шу тариқа бу борада ўз мажбуриятларини бажарганини маълум қилди. Вазирлик жуда кўп ҳужжатлар махфийлаштирилганини қурбонларни ҳимоя қилиш билан боғлади. Шу тариқа америкаликлар талабига кўра 6 миллион саҳифа ҳужжат, 2 мингта видео ва 180 минг расм эълон қилинди. Лекин уларнинг ҳеч бирида ким педофил Эпштейннинг оролига бориб вояга етмаган қизлар билан жинсий алоқа қилгани айтилмаган. Бу эса фитна назарияларини кучайтиради холос.

Америка элитаси вакили

6 миллион саҳифа ҳужжатда америкаликларни ўйлантираётган энг асосий саволга жавоб топилмайди: ўртамиёна молиячи, ҳеч қандай йирик корхонаси бўлмаган Жефри Эпштейн Америка элитасининг энг машҳур вакиллари даврасига қандай кириб қолган?

Мавжуд фактлардан шундай таассурот пайдо бўладики, Эпштейннинг ягона «таланти» АҚШ элитаси вакиллари учун аёллар иштирокида базмлар ташкил қилиш бўлган. Балки ана шу элита вакилларига базмлар ташкил қилиб бергани эвазига бойлик орттириб орол сотиб олгандир бу монстр?

Ва энг даҳшати, Эпштейн юзлаб вояга етмаган қизларни авраб ўз оролига олиб борган, балки элита вакиллари иштирокидаги кечаларда ҳам вояга етмаган болалар эксплуатация қилингандир? Америкаликлар мана шу саволга жавоб излашмоқда. Улар «Мамлакат юзига айланган инсонлар бу болаларни зўрловчи педофил билан кулиб расмга тушган, унинг тадбирларида қатнашган, биз болаларни бемалол кўчага чиқаришга қўрқиб қолдик, бизга ҳақиқатни айтинглар», демоқчи ва улар ҳақ. Ҳар қандай жамият болалардан жинсий майли йўлида фойдаланадиган пасткашларни таниб олишга ҳақли. Улар ким бўлса ҳам, қайси лавозимда ишласа ҳам.

Айтганча, ҳозир Америка элитасидаги казо-казо ва ҳоказо инсонларнинг Эпштейн билан боғлиқлиги, айниқса Трампнинг Эпштейн билан тушган янгидан-янги суратларини кўриб Делавэрдаги уйида саратондан даволанаётган 83 ёшли Жо исмли америкалик қария кулиб қўяётган бўлса керак…