Колумбия президенти Петро Оқ уйда Трамп билан учрашди

Оқ уй раҳбари Колумбия етакчиси билан “жуда яхши тил топишгани”ни айтди. Трамп яқиндагина уни АҚШга кокаин етказиб беришда айблаган ва америкаликлар Николас Мадурони қўлга олиш бўйича операциясидан кейин “ўзини эҳтиёт қилсин” дея огоҳлантирган эди.

“Биз жуда яхши тил топишдик. У билан биз энг яқин дўстлар эмас эдик, лекин мен хафа бўлганим йўқ, чунки уни ҳеч қачон учратмаганман. Мен уни умуман танимасдим, ва биз жуда яхши тил топишдик”, — деди Оқ уй раҳбари музокаралар якунланганидан бир неча соат ўтиб журналистларга. Трамп қўшимча қилишича, икки давлат наркотрафикка қарши курашда ҳамкорлик устида, шунингдек Колумбия раҳбарига, унинг оила аъзоларига ва Жанубий Америкадаги ушбу мамлакат ички ишлар вазирига нисбатан жорий этилган санкцияларни бекор қилиш устида ишлаяпти.

Ўз навбатида, Густаво Петро Колумбиянинг Caracol радиостанциясига, у ва Доналд Трамп учрашувда Венесуэла газини Колумбия орқали экспорт қилиш имконияти, наркотрафикка қарши кураш, шунингдек “Колумбиянинг Эквадор билан савдо ва наркотик низоси”ни муҳокама қилганини айтди. Унинг қўшимча қилишича, Оқ уй раҳбари ушбу баҳсда воситачи бўлишга рози бўлган.

Густаво Петро идораси Х ижтимоий тармоғида эълон қилган бир нечта суратларга кўра, Оқ уйдаги суҳбат Овал кабинетда АҚШ вице-президенти Жей Ди Вэнс, давлат котиби Марко Рубио ва Колумбиянинг юқори мартабали амалдорлари иштирокида бўлиб ўтган. “Ҳақиқат шуки, менга тўғри америкаликлар ёқади — ўз ўйлаганини айтадиган одамлар. Биз, шубҳасиз, бир-биримиздан жуда фарқ қиламиз. Лекин очиқлик ҳаммасидан устун”, — деди Петро.

Эълон қилинган суратлардан бирида Трамп Петроға совға қилинган ўзининг 1987 йилда чиққан “Битим тузиш санъати” (The Art of the Deal) китоби нусхасига “Сиз ажойибсиз” деган ёзув билан имзо қўйгани кўринади.

АҚШ Молия вазирлиги 2025 йил 24 октябрда Колумбия президентига, унинг оила аъзоларига, шунингдек мамлакат ички ишлар вазири Армандо Бенедеттига нисбатан шахсий санкциялар жорий этган, жумладан уларнинг АҚШга киришини тақиқлаган. Вашингтон ўшанда Петро “наркокартеллар гуллаб-яшнашга йўл қўйгани ва улар фаолиятини тўхтатишдан бош тортгани”ни даъво қилган эди. Шу билан бирга, Колумбияда Петронинг ўғли отасининг сайлов кампанияси учун эҳтимолий наркосавдогардан пул олганликда айбланиши ҳақида AFP агентлиги ҳам қайд этган.

Америка санкцияларидан кейин 2022 йилда ҳокимиятга келган Густаво Петро Колумбия пойтахтида Трамп сиёсатига қарши намойишлар ўтказишга чақирган. Бу сиёсатга АҚШ ҳарбийларининг Кариб денгизида, эҳтимол, наркокартелларга тегишли деб ҳисобланган Колумбия кемаларига берган зарбалари ҳам киритилади. Фақат икки ой ичида АҚШ 10 та шундай кемани йўқ қилган ва уларда бўлган камида 43 нафар кишини ўлдирган. Шунингдек, Колумбия етакчиси АҚШнинг Исроилни қўллаб-қувватлашини кескин танқид қилиб келган.

Бунга жавобан Трамп Петрога “бандит” деб баҳо берган ва мамлакатга наркотрафикка қарши курашда кўрсатилаётган ёрдамни тўхтатишини эълон қилган.