АҚШ элчиси Полша Сейми спикери билан алоқаларни узмоқда

АҚШнинг Варшавадаги элчиси Том Роуз Полша парламенти қуйи палатаси — Сейм спикери Влодзимеж Чажастий билан барча алоқаларни тўхтатишини билдирди. Чажастий Доналд Трампни Нобел тинчлик мукофотига номзод сифатида илгари суришни қўллаб-қувватлашдан бош тортган эди. Бу ҳақда жума куни, 6 февралда Полша радиоси хабар берди. Роуз поляк спикерини Трампга нисбатан «қўпол ва асоссиз ҳақоратлар» қилганликда айблади.

Варшава — АҚШнинг Европадаги энг яқин иттифоқчиларидан бири; Полша НАТО давлатлари орасида энг юқори ҳарбий бюджетлардан бирига эга. Шунингдек, Полша Украинага фаол ёрдам бериб келмоқда, бироқ Варшава ҳокимияти Трампнинг Москва билан тинчлик келишуви бўйича келишишга уринишларига шубҳа билан қарайди.

Сейм спикери Оқ уй раҳбари Нобел тинчлик мукофотига лойиқ эмас, деган фикрни билдирди. Поляк сиёсатчисига кўра, АҚШ раҳбарининг «Тинчлик кенгаши» каби янги платформалар яратиши «иллюзор» ҳисобланади. Унинг фикрича, Полша мавжуд ташкилотларни — ЕИ, НАТО, БМТ ва Жаҳон соғлиқни сақлаш ташкилоти (ЖССТ)ни мустаҳкамлаши керак. Спикер Трамп «куч сиёсати»ни намоён этмоқда, деб хулоса қилди.

У шунингдек, Трампнинг Гренландияни аннексия қилиш истагини танқид қилди ҳамда АҚШ ва НАТО иттифоқчилари Афғонистондаги ҳарбий операцияда Европанинг ҳиссасини камситишини ҳам қоралади.

Пайшанба куни, 5 февралда поляк сиёсатчиси элчининг қарори уни ўз позициясини ўзгартиришга мажбур қилмаслигини айтди. «Элчининг баёнотидан афсусдаман, аммо (Полша учун — таҳр.) муҳим бўлган бу асосий масалалар бўйича позициямни ўзгартирмайман», — деди у.

Спикер аъзо бўлган «Янги сўллар» партияси Полша бош вазири Доналд Туск раҳбарлигидаги кенг ҳукумат коалицияси таркибига киради. Туск АҚШ элчисининг позициясини танқид қилди: «Жаноб элчи Роуз, иттифоқчилар бир-бирини ҳурмат қилиши керак, ўргатмаслиги керак. Ҳеч бўлмаганда, Полшада шериклик айнан шундай тушунилади», — деб ёзди Туск X ижтимоий тармоғида.

Аввалроқ АҚШ Конгресси Вакиллар палатаси спикери Майк Жонсон ва Исроил Кнессети спикери Амир Охана президент Доналд Трампни Нобел тинчлик мукофоти билан тақдирлаш ташаббуси билан чиққан эди.