Трамп АҚШда иқлимни ҳимояси бўйича асосий меъёрлардан бирини бекор қилди

АҚШ президенти Доналд Трамп пайшанба, 12 феврал куни “хавф ҳақида хулоса” (endangerment finding) деб аталадиган ҳужжат бекор қилинганини эълон қилди. 2009 йилда қабул қилинган бу ҳужжат иссиқхона газларини соғлиқ учун хавф туғдирадиган омил сифатида тан олган эди. Бу қарор иссиқхона газлари чиқиндиларига қўйилган чекловларни, жумладан автомобилсозлик саноати учун ҳам, олиб ташлаш имконини беради.

Трамп бу қадамни АҚШ тарихидаги “энг буюк дерегуляция чораси” деб атади. АҚШнинг собиқ президенти Барак Обама даврида қабул қилинган иқлимни ҳимоя қилиш қонунларини эса Трамп “фожиали” деб баҳолади. Унинг сўзларига кўра, ушбу чоралар “АҚШ автомобилсозлик саноатига жиддий зарар етказган ва америкаликлар учун нархларни сезиларли оширган”.

Бекор қилинган ҳужжат асосида АҚШда кўмир ва газ электр станциялари учун қатъий экологик стандартлар жорий этилган, шунингдек ташлама газлар (автомобил чиқарган газлар) миқдорини чекловчи қоидалар амал қилган.

Атроф-муҳитни муҳофаза қилиш агентлиги (EPA) раҳбари Ли Зелдин билдиришича, стандартларни бекор қилиш америкалик солиқ тўловчиларга 1,3 триллион долларни тежаш имконини беради. Зелдин бу ҳисоб-китоблар қандай қилинганини тушунтирмаган.

АҚШнинг собиқ президенти Барак Обама Доналд Трамп қарорини танқид қилди. Обаманинг айтишича, endangerment finding бўлмаса, америкаликлар “камроқ ҳимояланган, камроқ соғлом ва иқлим ўзгаришига қарши курашишга камроқ қодир бўлади — буларнинг ҳаммаси қазилма ёқилғи саноати янада кўпроқ пул ишлаши учун”, деди у.

Трампни Greenpeace экологик ташкилоти ҳам кескин танқид қилди ва уни иқлим ўзгариши ҳақида “доимий ёлғон”да айблади. “Бу қадам йирик нефт компанияларини бойитади, бадалини бошқаларнинг ҳаммаси тўлайди”, — деди ташкилот вакили Тим Донаги.

Бундан олдин АҚШ президенти иқлим ўзгариши ҳақидаги огоҳлантиришларни “дунёда қилинган энг катта фирибгарлик” деб атаган эди.