Европа кенгаши собиқ бош котиби Ягланднинг уйида тинтув ўтказилди

Норвегия полициясининг иқтисодий жиноятларга қарши кураш бўлими (Økokrim) Норвегиянинг собиқ бош вазири ва Европа кенгаши собиқ бош котиби Турбёрн Ягланднинг уйида ҳамда бошқа турар жой объектларида тинтув ўтказди. Бу ҳақда пайшанба, 12 феврал куни Verdens Gang (VG) газетаси Ягланднинг Elden Advokatfirma юридик фирмасидаги адвокатига таяниб хабар берди.

Тергов ҳаракатлари Норвегияда собиқ бош вазирга нисбатан америкалик молиячи Жеффри Эпштейн иши бўйича ҳужжатлар эълон қилинганидан кейин бошланган тергов билан боғлиқ равишда олиб борилмоқда.

Сиёсатчига расман гумонланувчи мақоми берилган. Тинтувлар Ослода ва Норвегиянинг шарқий соҳил ҳудудларида ўтказилди.

Аввалроқ, 11 феврал куни, Европа кенгаши вазирлар қўмитаси собиқ бош котибдан дахлсизликни олиб ташлагани маълум бўлган эди. Тергов оғирлаштирувчи ҳолатларда коррупция айбловлари билан боғлиқ.

Бош котиб Ален Берсе шунингдек ички маъмурий текширувни Европа кенгашининг ички назорат дирекциясига топширишга қарор қилди. Шу билан бирга, Берсе бошқарув бўйича институционал амалиётларни ҳар томонлама кўриб чиқиш жараёнини ҳам бошлаган.

Норвегиянинг Verdens Gang газетаси Ягланд билан боғлиқ Эпштейн иши материалларини ўргангани ҳақида хабар берди. Унга кўра, Ягландда Жеффри Эпштейндан квартира сотиб олиш учун “кафолат” бўлган. Шунингдек, сиёсатчи бир неча марта Эпштейннинг Ню-Йорк ва Париждаги квартираларида тунагани, 2014 йилда эса Ягланд ва унинг оиласи Эпштейн оролига сафар режалаштиргани, аммо у сафар кейинчалик бекор қилингани ҳақида AFP агентлиги ёзади.

Ягланд Эпштейн билан алоқалари “одатий дипломатик фаолият”нинг бир қисми бўлганини айтган. Феврал ойи бошида у Aftenposten газетасига бу муносабатларни сақлаб қолгани “хатолик” бўлганини тан олган.

Ягланд 1996–1997 йилларда Норвегия бош вазири, 2009–2015 йилларда Нобел тинчлик мукофотини топшириш қўмитаси раиси, 2009–2019 йилларда эса Европа кенгаши бош котиби лавозимларида ишлаган.