«Путин шоҳ эмас, урушнинг қули» – Зеленский

Ғарбдаги асосий сиёсий форумлардан бири – ҳар йили ўтказиладиган Мюнхен хавфсизлик конференциясида Украина президенти Россия етакчисини «урушнинг қули» деб атади ҳамда яна бир бор у Украина билан чекланмаслиги ҳақида огоҳлантирди.

Фото: EPA

Володимир Зеленский 14 феврал куни хавфсизлик бўйича Мюнхен конференциясининг иккинчи кунида чиқиш қилди.

У яна бир бор Россия ҳукумати урушни якунламоқчи эмаслигини қайд этиб, келгусида уруш кенгайиши ва Европа мамлакатлари тўғридан тўғри таҳдид остида қолиши мумкинлигидан огоҳлантирган.

«У ўз ҳаётида ҳокимиятсиз ёки ҳокимиятдан кейинги давр бўлишини тасаввур қила олмайди. Нормал нарсалар уни қизиқтирмайди. У ҳозирда тирик бўлган одамлардан кўра, шоҳ Пётр ва императрица Екатерина билан ҳудудий истилолар бўйича кўпроқ маслаҳатлашади. У ҳозир бор эътиборини Украинага қаратган, аммо Европанинг бошқа давлатларини ҳам эътибордан четда қолдирмайди, чунки у уруш ғоясидан воз кечолмайди. Сиз Путинни урушсиз тасаввур қила оласизми?» – деган Зеленский.

У Путинни тўхтатиш учун Украинага ҳам, Европага ҳам реал кафолатлар зарурлиги, бу кафолатлар яна қанча вақт уруш бўлмаслигини белгилашини айтиб ўтган.

«У ўзини шоҳ деб ҳисоблаши мумкин, лекин аслида у урушнинг қули. Агар у яна 10 йил яшайдиган бўлса, уруш яна қайтади ва у янада кенг кўламли бўлади. Шунинг учун Украина ва Европага кучли хавфсизлик кафолатлари керак. Бу кафолатлар тинчлик келишувларидан олдин пайдо бўлиши керак», – дея давом этди Украина президенти.

Зеленский Венгрия бош вазири, Россиянинг Европага таҳдидига скептик ёндашувчи Виктор Орбанни танқид қилган: «Орбан ўз қорнини катталаштириш ҳақида ўйлашни бас қилиши лозим. У армияни катталаштириш ҳақида ўйлаши керак».

Зеленский Россиядан фарқли ўлароқ, Украина тинчлик музокаралари натижага олиб келиши учун барча имкониятларни ишга солаётганига ишонтирган. У музокараларга АҚШдан ташқари Европани ҳам жалб қилиш кераклигини қайд этган. Украина президенти Россиянинг тинчликка интилаётганига ишонмайди: акс ҳолда, Женевада бўлиб ўтадиган музокараларда делегацияга «тарихчи» Владимир Мединский бошчилик қилмаган бўларди.

«Путин Мюнхенни такрорлашни хоҳлайди. Фақат унинг ўзи Европани бўлиб олиш ҳақида гапирган 2007 йилги Мюнхенни эмас, балки олдтинги Путин Европани бўлиб олишни бошлаган 1938 йилги Мюнхенни», – дейди Зеленский.

Украина президенти ўз чиқиши давомида Россия зарбалари кўлами ва уларнинг оқибатлари ҳақида гапирди ҳамда нутқнинг бу қисмида инфографика билан тўлдирди. «Вайрон бўлган кўчалар, вайрон бўлган уйлар, ер остида қурилган мактаблар – бу Украинадаги кундалик ҳаёт», – деди у.