Ишингер: Украинадаги урушнинг натижаси Европа келажагини белгилайди

Мюнхен хавфсизлик конференцияси (MSC) раиси вазифасини бажарувчи Волфганг Ишингер 15 феврал, якшанба куни форумда сўзга чиқар экан, Европа ва АҚШни Россияга босимни кучайтиришга чақирди. “Ҳозир бизга навбатдаги нутқлар давраси эмас, ундан ҳам кўпроқ нарса керак. Бизга ҳаракатлар режаси керак: айнан нимани европаликлар қилишга тайёр, қачон ва қандай”, — деди у.

Якунловчи сўзида Ишингер Россиянинг Украинага қарши уруши Европанинг хавфсизлиги учун асосий чақириқ эканини таъкидлади. “Биз Россияга босимни ошириш учун кўпроқ иш қила оламиз: Украинага унга керак бўлган қуролларни бериш, жумладан анча кўпроқ ҲҲМ тизимларини, РФга қарши санкцияларни кучайтириш, шунингдек ‘соя флот’ни таъқиб қилиш — шунда Россия учун урушнинг баҳоси ошади”, — дея санаб ўтди Ишингер.

“Бу уруш қандай тугаши ҳақидаги савол — Европа учун экзистенциал. Унга жавоб бу қитъанинг келажагини белгилайди”, — деб таъкидлади дипломат ва буни “Европадагиларнинг барчаси эмас, Вашингтондаги дўстлар ҳам” тушунишига умид билдирди. “Мен умид қиламанки, биз иттифоқчи ва шериклар сифатида якдил бўламиз ва Украина ғалаба қозона олиши учун биргаликда ҳаракат қилишга қатъий бел боғлаймиз”, — дея хулоса қилди у.

Ташкилотчилар маълумотига кўра, 62-Мюнхен хавфсизлик конференциясида 115 дан ортиқ давлатдан мингдан зиёд иштирокчи қатнашган. Улар орасида 60 га яқин давлат ва ҳукумат раҳбарлари, шунингдек 50 дан зиёд халқаро ташкилот раҳбарлари бўлган.