Тошкентда яроқлилик муддати ўтган тиббий реагентлар савдоси фош этилди

ДХХ ва Иқтисодий жиноятларга қарши курашиш департаменти ҳамкорлигида ўтказилган тезкор тадбирда пойтахтда тиббий реагентлар савдоси билан шуғулланувчи МЧЖ раҳбари муддати ўтган реагентларни сотган пайтда ушланди. Омборхоналарда эса 2 млрд сўмга яқин қийматдаги муддати ўтган ва рўйхатдан ўтказилмаган (контрафакт) маҳсулотлар аниқланди.

Давлат хавфсизлик хизматининг Тошкент шаҳар бўйича бошқармаси ҳамда Иқтисодий жиноятларга қарши курашиш департаменти ҳамкорлигида ўтказилган тезкор тадбирда пойтахтда фаолият юритувчи, тиббий реагентлар савдоси билан шуғулланувчи МЧЖ раҳбари яроқлилик муддати ўтган маҳсулотларни сотган вақтида ашёвий далиллар билан ушланди.

Маълум қилинишича, у лаборатория текшируви учун мўлжалланган, яроқлилик муддати ўтган қиймати 32 млн сўмлик 20 дона реагентни 16 млн сўмга сотган пайтда қўлга олинган.

Шунингдек, Тошкент шаҳри ва вилоятида жойлашган унга тегишли 2 та омборхона “Фармацевтика маҳсулотлари хавфсизлик маркази” давлат муассасаси ходимлари жалб этилган ҳолда кўздан кечирилганда, умумий қиймати 2 млрд сўмга яқин бўлган 216 турдаги 1414 қути яроқлилик муддати ўтган маҳсулотлар мавжудлиги аниқланган.

Бундан ташқари, хориждан олиб келинган ва тегишли тартибда рўйхатдан ўтказилмаган 28 турдаги 322 қути маҳсулот (контрафакт) ҳам топилгани қайд этилди.

Сифатсиз реагентларнинг ишлатилиши келгусида беморларга нотўғри ташхис қўйилиши ва муолажа жараёнида салбий оқибатларни келтириб чиқариши мумкин.

Ҳозирда тиббий воситалар бўйича тегишли тартибда экспертиза тайинланиб, терговга қадар текширув ишлари олиб борилмоқда.