Россияда операторлар ФХХ талаби билан алоқани ўчириши мумкин

РФ Давлат думаси “Алоқа тўғрисида”ги қонунга тузатишларни қабул қилди — энди улар Федерал хавфсизлик хизмати (ФХХ)га РФдаги исталган алоқани президент Владимир Путин фармонлари асосида блоклаш имконини беради. Қонун лойиҳаси сешанба, 17 феврал куни пленар мажлисда иккинчи ва учинчи ўқишда қўллаб-қувватланди. Тузатишларни тақдим қилиш ва овоз беришга бор-йўғи икки дақиқа сарфланган.

Ҳужжатга кўра, алоқа операторлари ФХХдан талаб келиб тушганида “президентнинг норматив-ҳуқуқий ҳужжатларида белгиланган ҳолларда” хизмат кўрсатишни тўхтатиб туриши шарт.

Лойиҳанинг биринчи версиясида алоқа хизматлари ФХХдан “сўров” келиб тушганда, “президент ва ҳукуматнинг норматив-ҳуқуқий ҳужжатларида белгиланган ҳолларда, фуқаролар ва давлатни пайдо бўлаётган хавфсизлик таҳдидларидан ҳимоя қилиш мақсадида” тўхтатилиши мумкинлиги айтилган эди. Иккинчи ўқишга келиб ҳужжатдаги “сўров” сўзи “талаб”га алмаштирилди, аҳолини “хавфсизлик таҳдидлари”дан ҳимоя қилиш ҳақидаги қисм эса бутунлай чиқариб ташланди. Шунингдек, матндан ҳукумат ҳақидаги эслатма ҳам олиб ташланиб, фақат РФ президенти қолдирилди.

“Первый отдел” ҳуқуқшуноси Евгений Смирнов фикрича, тузатишлар қабул қилингач, Россияда алоқани блоклаш сабаблари чекланмайди. «Бу, аслида, президентнинг қўлини бўшатади, чунки у ана шу ҳолатларни ўзи белгилайди», — деди Смирнов “Агентство” нашрига берган изоҳида.

Бошқа ҳуқуқий эксперт Валерия Ветошкинанинг қарашича, тузатишлар амалда мавжуд кучлар мувозанатини тубдан ўзгартирмайди, фақат юридик расмийлаштиришни ҳамда ФХХ талаблари учун формал тўсиқларни соддалаштиради.

Қабул қилинган қонунга кўра, ФХХ талаби билан алоқа блокланган ҳолларда операторлар хизмат кўрсатиш шартномаси бўйича мажбуриятлар бажарилмагани учун мижозлар олдида жавобгар бўлмайди. Қонун президент имзолаганидан 10 кун ўтгач кучга киради.