Украинанинг собиқ энергетика вазири икки ойга ҳибсга олинди

Украинанинг Олий антикоррупция суди сешанба, 17 феврал куни пул ювишда айбланаётган мамлакатнинг собиқ энергетика вазири Герман Галушченкога нисбатан 60 кун — 15 апрелгача қамоқ эҳтиёт чорасини қўллади. Шу билан бирга, агар Галушченко 200 млн гривна (ҳисоб-китоб бўйича — 3,9 млн евро) миқдорида гаров пули тўласа, ҳибсдан озод қилиниши мумкин. Айблов томони гаров миқдорини 425 млн гривна (тахминан 8 млн евро) этиб белгилашни талаб қилган. Галушченко эса суд мажлисида 30 млн гривнадан ортиқ пул тўлай олмаслигини айтган.

Собиқ вазир вақтинча озод этилган тақдирда унга Киев шаҳри ва Киев вилояти ҳудудидан ташқарига чиқиб кетиш тақиқланади, шунингдек, иш бўйича бошқа фигурантлар, жумладан Тимур Миндич билан мулоқот қилиш ҳам ман этилади. “Интерфакс-Украина” агентлиги ёзишича, Герман Галушченко суднинг бу қароридан норози эканини билдирган ва апелляция бериш учун адвокатларга пул йиғишини айтган.

Герман Галушченко 2026 йил 15 феврал куни Украина ҳудудини тарк этишга уринган пайтда қўлга олинган. Украина Ихтисослаштирилган антикоррупция прокуратураси ва Украина Миллий антикоррупция бюроси маълум қилишича, у Украинадаги “Энергоатом”да маблағларнинг катта миқёсда ўғирланиши билан боғлиқ “Мидас” ишида фигурант ҳисобланади.

16 феврал куни Галушченкога пул ювиш ҳамда у ҳукуматда ишлаган даврда энергетика соҳасидаги қонунбузарликлар ҳисобига 112 млн доллардан (94 млн евро) ортиқ маблағ олган жиноий ташкилотда иштирок этганлик бўйича айблов эълон қилинган.

Герман Галушченко Украина энергетика вазири лавозимини 2021 йил апрелидан 2025 йил июлигача эгаллаган, кейин эса Украина президенти Володимир Зеленский уни мамлакат адлия вазири этиб тайинлаган. Миллий антикоррупция бюроси 2025 йил 10 ноябрда Галушченкода, шунингдек “Энергоатом”да ва Зеленскийнинг узоқ йиллик ҳамкори, тадбиркор ҳамда “Квартал 95” студиясининг ҳаммуассиси Тимур Миндичда тинтувлар ўтказган. Можаро фонида 12 ноябр куни Галушченко адлия вазири вазифаларини бажаришдан четлатилган.

Тергов версиясига кўра, “Энергоатом”даги жиноий схема ташкилотчилари корхона шартномалари қийматининг 10–15 фоизи миқдорида “откат” талаб қилган. Хусусан, “Энергоатом” контрагентлари етказиб берилган товар ва хизматлар учун тўловлар блокланиб қолишининг олдини олиш ва етказиб берувчи мақомини сақлаб қолиш учун “откат” тўлашга мажбур бўлган. Бу амалиёт “шлагбаум” деб ном олган.

Миллий антикоррупция бюроси хабарида шундай дейилган: «Аслида шундай тизим яратилганки, даромади 200 миллиард гривнадан ортиқ бўлган стратегик корхонани топ-менежерлар, кузатув кенгаши ёки мулкдор сифатида давлат эмас, балки ваколатга эга бўлмаган, ўз зиммасига соя бошқарувчи ролини олган бегона шахс бошқарган».