Разведка: 1000 нафардан ортиқ кениялик Россия томонидан урушга ёлланган

Россия Украинадаги урушда иштирок этиш учун 1000 нафардан ортиқ кенияликни ёллаган. Бу ҳақда пайшанба, 19 феврал куни Reuters агентлиги Кения разведкаси маълумотларига таяниб хабар берди. Бу кўрсаткич ҳукуматлар шу пайтгача тахмин қилганидан беш баробар кўп.

Кения парламенти — Миллий ассамблеянинг қуйи палатасида кўпчилик етакчиси Кимани Ичунгва 18 феврал куни депутатларга разведка ҳисоботини тақдим этган.

Ҳисоботга кўра, коррупцияга ботган амалдорлар ва одам савдоси билан шуғулланувчи шахслардан иборат тармоқ рекрутларни ёллаган. Улар орасида собиқ ҳарбийлар, полициячилар ва ишсизлар бўлган. Ёлловчилар эса ойлик маош сифатида тахминан 2715 доллар (2308 евро) ва 9309 долларгача (7916 евро) мукофот пулларини ваъда қилган.

Феврал ойига келиб, 89 нафар кениялик Украина фронтида бўлган, 39 нафари шифохоналарда даволанаётган, 28 нафари эса бедарак йўқолганлар қаторида қайд этилган.

Ҳисоботда айтилишича, кенияликлар дастлаб мамлакатни туристик визалар билан Туркия ёки Бирлашган Араб Амирликлари орқали тарк этган. Кейинчалик Найроби аэропортида назорат кучайтирилганидан сўнг, рекрутлар Уганда, Жанубий Африка ва Конго Демократик Республикаси орқали чиқиб кета бошлаган. Reuters ёзишича, ишга ёллаш агентликлари аэропортлардаги коррупциялашган ходимлар, иммиграция хизматлари, шунингдек Найробидаги Россия элчихонаси ва Москвадаги Кения дипломатик ваколатхонаси ходимлари билан ҳамкорлик қилган.

Найробидаги дипломатик миссияда Россиянинг ноқонуний ёллашга алоқадорлиги рад этилган. У ерда “чет эл фуқаролари Россия Қуролли кучлари сафига ихтиёрий равишда қўшилиши мумкин”, дея билдирилган.

Шу билан бирга, Кения ташқи ишлар вазири Мусалия Мудавади сўзларига кўра, вазият бўйича музокаралар ўтказиш учун март ойида Россияга ташриф буюришни режалаштирмоқда, деб аниқлик киритди Reuters.

Аввалроқ, кениялик профессионал спортчи Эванс Кибет уни Россияга югуриш мусобақаларида қатнашиш учун таклиф қилишганини, кейин эса алдаб шартнома имзолатиб, Украинага урушга жўнатишганини айтган. Эванснинг сўзларига кўра, у биринчи вазифа пайтида қочиб кетган ва Харкив вилоятида Украина Қуролли кучларига таслим бўлиб асир тушган.