Трамп барча импортга янги божлар жорий этилишини эълон қилди

АҚШ президенти Доналд Трамп Америка Қўшма Штатларига олиб кириладиган барча товарлар импортига мавжуд божларга қўшимча равишда 10 фоизлик тариф жорий этилишини эълон қилди.

Фото: REUTERS

Трамп бу ҳақда 20 феврал куни АҚШ Олий судининг қарорини шарҳлар экан, маълум қилди. Суд 2025 йилда президент кўплаб давлатларга нисбатан божларни бир томонлама тарзда жорий этиб, қонунни бузган, деган хулосага келган.

АҚШ президентининг айтишича, Олий суд қарор чиқаришда «чет эл манфаатлари таъсири остида» бўлган.

Трампнинг сўзларига кўра, миллий хавфсизлик манфаатларини таъминлаш мақсадида жорий этилган барча божлар ўз кучида қолади. Шунингдек, бир нечта текширувлар бошланиши маълум қилинди.

АҚШ Олий суди 20 феврал куни Трамп кўплаб давлатларга қарши божлар жорий этишда қонунни бузган, деган қарор чиқарди. Президент фақат миллий фавқулодда ҳолатларда қўлланиши мумкин бўлган қонундан фойдаланган. Суд фикрича, Трамп бу чораларни жорий этишдан олдин Конгресс рухсатини олиши керак эди.