Эрон Россиядан зенит-ракета комплекслари ва минглаб ракеталар сотиб олади

Financial Times маълумотларига кўра, РФ ва Эрон 2025 йил декабр ойидаёқ “Рособоронэкспорт” орқали 500 та “Верба” КЗРК ва минглаб ракеталарни етказиб бериш бўйича келишиб олган. Теҳрон ушбу келишувни АҚШнинг ядро объектларига берган зарбаларидан кейин бошлаган.

9М336 Верба комплекси Фото: themoscowtimes.com

Эрон Россия билан 500 та “Верба” мобил учириш қурилмалари ва тахминан 2500 та 9М336 кўчма зенит ракеталарини уч йил давомида 500 млн евро суммасига сотиб олиш бўйича келишувга эришди. Москва ва Теҳрон бу бўйича тегишли шартномани 2025 йил декабр ойида имзолаган. Бу ҳақда якшанба, 22 феврал куни Financial Times (FT) нашри келишув тафсилотларидан хабардор манбаларга таяниб хабар берди.

FT манбаларининг айтишича, Теҳрон ўтган йил июл ойида — АҚШнинг Эрон ядро объектларига берган зарбалари фонида Москвага ракеталар сотиб олиш бўйича сўров билан мурожаат қилган.

2025 йил 17 январ куни Россия ва Эрон стратегик шериклик тўғрисида шартнома имзолаган. Томонлар унинг мақсади сифатида, жумладан иқтисодий ва ҳарбий ҳамкорликни ҳам ўз ичига олган ҳолда, муносабатларни чуқурлаштириш эканини эълон қилган.

2026 йил феврал ойи ўрталарида РФ Мудофаа вазирлиги Россия ва Эрон ҳарбий-денгиз кучлари Уммон кўрфазида қўшма манёврлар ўтказганини маълум қилди.

Ушбу ўқув манёврлар Теҳрон ва Вашингтон ўртасидаги муносабатлардаги кескинлик сақланиб турган, томонлар ядро келишуви бўйича келишишга уринган бир пайтда ўтказилди. Эрон вакиллари музокараларда олға силжиш борлигини айтмоқда, бироқ бу билан бир вақтда АҚШ Яқин Шарқда ҳарбий иштирокини кучайтирмоқда.

Жумладан, Эрон ва Россия ҳарбий-денгиз кучлари АҚШнинг “Авраам Линколн” авиаташувчиси яқинида манёврлар ўтказган. Оқ уй бу авиаташувчини 2026 йил январ ойида Эрон соҳиллари томон юборган эди.

Axios нашри манбалари таъкидлашича, АҚШ Яқин Шарқда кенг кўламли ҳарбий кампанияни бошлашга яқин. Президент маслаҳатчиларидан бирининг (исми ошкор этилмаган) сўзларига кўра, Доналд Трамп Эрон билан чўзилиб кетган можародан зериккан. Эҳтимолий урушда АҚШ томонида Исроил ҳам иштирок этиши мумкин.

Россия–Эрон стратегик шериклик шартномасида ўзаро мудофаа (бир-бирини ҳимоя қилиш) мажбурияти ҳақидаги модда мавжуд эмас.