Франция ТИВ Лиондаги фожиа ҳақидаги сўзлар сабаб АҚШ элчисини чақиртиради

Франция Ташқи ишлар вазирлиги АҚШнинг Франциядаги элчиси Чарлз Кушнерни — Доналд Трампнинг қудасини ТИВга чақиртирмоқчи. Бунга сабаб АҚШ президенти маъмуриятининг Лионда антифашистлар билан тўқнашувлардан кейин ўта ўнг фаол Квентин Деранк ҳалок бўлишига берган муносабати бўлди: Оқ уй бу ўлимни “терроризм” деб баҳолаган. Бу ҳақда якшанба, 22 феврал куни Франция ташқи ишлар вазири Жан-Ноэл Барро Inter радиостанциясига берган интервюсида билдирди. У шунингдек Трамп маъмуриятининг ҳаракатларини Франциянинг ички ишларига аралашув деб атади.

Барро мамлакат ҳукумати ўта ўнг фаол ўлимидан “сиёсий мақсадларда” фойдаланишни қабул қилиб бўлмас деб ҳисоблашини таъкидлади. У, айни пайтда, Франция “сиёсий зўравонлик” ҳақида “реакционерлардан” “дарс” олишга муҳтож эмаслигини ҳам алоҳида қайд этди.

Чарлз Кушнер — Доналд Трампнинг куёви Жаред Кушнернинг отаси. Жаред Кушнер АҚШ президентининг қизи Иванка Трамп билан турмуш қурган. Франция ТИВ Кушнерни 2025 йил ёзида ҳам тушунтириш бериш учун чақиртирган эди — у ўшанда мамлакатда “антисемитизм кескин ўсгани” ҳақида баёнот берган. Элчи шу пайтда Франция мактаб дастурида бу мавзу етарлича ёритилмагани сабабли, гўё ёш французларнинг ярми “Холокост ҳақида ҳеч қачон эшитмаган” деб иддао қилган.

12 феврал куни Лионда миллатчиларнинг “Бўйсунмас Франция” партияси сиёсатчисига қарши акцияси унинг тарафдорлари билан ўта ўнг фаоллар ўртасидаги тўқнашувлар билан якунланган. 23 ёшли Деранк бошидан оғир жароҳат олган ва вафот этган.

20 феврал куни Оқ уй содир бўлган воқеани кескин қоралаб, Деранкнинг ўлимини “терроризм” деб атаган. Ҳодиса ҳақида АҚШ Давлат департаменти ҳам фикр билдирган: “Зўравонликка тайёр радикал сўл ҳаракат кучаймоқда. Унинг Квентин Деранк ўлимидаги роли жамоат хавфсизлиги учун қандай таҳдид туғдиришини кўрсатади”. Бу баёнотни Франциядаги АҚШ дипломатик миссияси ҳам такрорлаган.

Бундан олдин Италия бош вазири Жоржа Мелони Деранк ўлимини “бутун Европа учун яра” деб атаган эди. Франция президенти Эммануэл Макрон эса бу баёнотни мамлакатнинг ички ишларига аралашув деб баҳолаб, Мелонини танқид қилган.