Орбан: Венгрия РФга қарши 20-санкциялар пакетини тўсиб қўяди

Венгрия бош вазири Киевнинг “Дружба” қувури орқали нефт ўтказишни тўхтатгани муносабати билан жавоб чораларини тилга олди. ЕИ РФга қарши 20-санкциялар пакетини 23 феврал куни — уруш бошланганининг тўрт йиллиги арафасида маъқулламоқчи.

Фото: Prime Minister's Press Office/Handout via REUTERS

Украина “Дружба” нефт қувури орқали нефт ўтказишни тўхтатгани сабабли Венгрия Россияга нисбатан Европа санкцияларининг 20-пакетини блоклайди. Бу ҳақда Венгрия бош вазири Виктор Орбан 22 феврал, якшанба куни X ижтимоий тармоғида ёзди.

“Дружба” нефт қувури ёпиқ турган пайтда биз қўл қовуштириб ўтирмаймиз. Венгрияга ёнилғи етказиб беришни таъминлаймиз ва етказиб бериш қайта тиклангунча зарур жавоб чораларини кўрамиз”, — деб ёзди Орбан.

Венгрия бош вазири тилга олган бошқа чоралар орасида — Украинага дизел ёнилғиси етказиб беришни тўхтатиш ва унга “ҳар қандай ҳарбий кредитларни беришдан бош тортиш” бор.

Европа Иттифоқи Россияга қарши 20-санкциялар пакетини 23 феврал куни Ташқи ишлар бўйича кенгаш йиғилишида — Украинадаги уруш бошланганининг тўрт йиллиги арафасида — тасдиқлашни режалаштирмоқда.

Украина ташқи ишлар вазири Андрей Сибиха аввалроқ “Дружба” нефт қувури орқали етказиб бериш 27 январдан бери тўхтатилганини Венгриянинг Украина ҳудудидаги қувур участкасига Россия зарба берганини “яширгани” билан изоҳлаган эди. Бунга жавобан Будапешт украин томони гўё ўша қувур участкасида электр таъминотини ўчириб қўйганини айтди. Словакия бош вазири Роберт Фицо 15 феврал куни Украина экспортни қайта тиклашни атайлаб чўзаётганини айблади.

Венгриянинг MOL нефт-газ компанияси 16 феврал куни мамлакат Энергетика вазирлигига стратегик захиралардан тахминан 250 минг тонна нефт ажратишни сўраб мурожаат қилди.

Ўз навбатида, Словакия бош вазири Роберт Фицо Киев 23 февралга қадар “Дружба” нефт қувури орқали Россия нефти транзитини қайта тикламаса, Украинага электр энергияси етказиб беришни тўхтатиши мумкинлигини айтди.

Украина Ташқи ишлар вазирлиги Фицо ва Орбаннинг Киевга электр энергияси етказиб беришни тўхтатиш ҳақидаги таҳдидларини “шантаж” деб атади.

Венгриянинг Vilaggazdasag (VG) нашри маълумотларига кўра, украин томони аввалроқ “Дружба” орқали Россия нефтини етказиб бериш ҳозирча фақат Словакияга тикланишини маълум қилган, аммо аниқ саналар айтилмаган.