Куба чегарачилари АҚШ катерини ўққа тутди: тўрт киши ҳалок бўлди

Куба чегарачилари АҚШ томонидан келиб, мамлакатнинг ҳудудий сувларига кирган тезюрар катерга ўт очган. CNN телеканали хабар беришича, чоршанба, 24 феврал куни содир бўлган воқеа натижасида катерда бўлган тўрт киши ҳалок бўлган, яна олти киши яраланган. Шунингдек, бир нафар чегарачи ҳам яраланган.

Куба Ички ишлар вазирлиги маълумотига кўра, Флорида штатида рўйхатдан ўтган катер Кубанинг Виля-Клара провинциясидаги Фалконес-Кей ороли яқинида мамлакатнинг ҳудудий сувларига кириб келган. Шу сабабли чегарачилар кемани идентификация қилиш учун унга яқинлашган. Катердагилар кубаликларга ўқ узиб, кема капитанини яралагандан кейин, чегарачилар куч ишлатиш чораларига ўтган. Кейинчалик яраланганларга тиббий ёрдам кўрсатилган.

Расмий Ҳавана катер экипажида “террористик ниятлар” бўлганини билдирган. “Бортда ўн нафар қуролланган одам бор эди, улар Кубага ноқонуний равишда кириб келмоқчи бўлган”, — дейилади Куба Ички ишлар вазирлиги баёнотида.

АҚШ вице-президенти Жей Ди Вэнс Оқ уй вазиятни кузатаётганини айтган ва “у ёмон эмас, деган умиддамиз”, деб билдирган. Унинг сўзларига кўра, АҚШ давлат котиби Марко Рубио уни мазкур ҳодиса ҳақида хабардор қилган, аммо тафсилотларни келтирмаган.

Флорида губернатори Жеймс Утмайер федерал идоралар бошлаган терговга ёрдам бериш учун штат ҳуқуқни муҳофаза қилувчи органларига топшириқ берганини маълум қилган. Флоридадан сайланган республикачи конгрессмен Карлос Антонио Гименес Куба ҳукуматини “инсониятга қарши саноқсиз жиноятлар”да айблаган.

Марко Рубио эса Вашингтон мазкур воқеа бўйича ўз текширувини ўтказиши ва тегишли хулосалар чиқаришини билдирган. У Куба акваториясида АҚШ катерининг бўлиши ҳеч қандай АҚШ операциялари билан боғлиқ эмаслигини, шунингдек катер бортида ҳокимият вакиллари бўлмаганини таъкидлаган.

Флоридадан йўлга чиққан катер билан боғлиқ ҳодиса АҚШнинг Кубага босимни кучайтириши давом этаётган бир пайтда содир бўлган. Венесуэлада ҳарбий операция ўтказилиб, Николас Мадуро қўлга олинганидан кейин, АҚШ президенти Доналд Трамп Куба ҳокимиятини АҚШ миллий хавфсизлигига таҳдид яратишда айблаб, Ҳаванага нефт ёки нефт маҳсулотлари етказиб беришни давом эттирадиган барча давлатларга божхона божлари жорий этиш билан таҳдид қилган.

Нефт танқислиги орол иқтисодиётига, жумладан туризм соҳасига ҳам жуда салбий таъсир кўрсатган. Авиаёнилғи етишмаслиги сабабли феврал бошидан бери хорижий авиакомпаниялар Кубага рейсларни бекор қилишни бошлаган. Феврал ўртасида Испания оролга озиқ-овқат ва дори-дармон юборишини маълум қилган, Мексика ҳам мамлакатга гуманитар ёрдам берган. Ҳавана эса АҚШ билан олдиндан шарт қўймасдан музокараларга тайёр эканини айтмоқда.