Мерц Хитойда Пекинни Украинада тинчлик учун РФга таъсир ўтказишга чақирди

Германия Федератив Республикаси канцлери Фридрих Мерц Пекинда Хитой Халқ Республикаси раиси Си Жинпинг билан учрашуви чоғида Хитой раҳбаридан РФга ўз таъсирини ишлатиб, Москвани Украинадаги урушни тугатишга кўндиришни сўраган. Бу ҳақда Мерцнинг ўзи чоршанба, 25 феврал куни Германия ва Хитой етакчилари учрашуви якунлари бўйича ОАВ билан суҳбатда маълум қилди.

“Биз Пекиндан бериладиган сигналлар Москвада жуда жиддий қабул қилинишини биламиз — бу ҳам сўзларга, ҳам амалий қадамларга тааллуқли”, — деб канцлер сўзларини келтиради Associated Press агентлиги. Мерц Си Жинпинг бу чақириққа қандай муносабат билдиргани ҳақида маълумот бермади.

Хитойнинг давлат ахборот агентлиги “Синхуа” ёзишича, ХХР раиси Мерцга Хитой “Украинадаги можаро”ни дипломатия йўли билан ҳал этишни қўллаб-қувватлашини айтган, бироқ бу жараён “барча томонларнинг қонуний манфаатларини ҳисобга олиши” ва уларнинг жараёнда “тенг иштирокини таъминлаши” кераклигини таъкидлаган.

Расман Хитой РФнинг Украинага қарши урушига нисбатан бетараф эканини айтади, аммо шу билан бирга Москвага ҳарбий соҳада ҳам қўлланиши мумкин бўлган технологияларни, жумладан учувчисиз учиш аппаратларини ҳам етказиб беришда давом этмоқда. Бу эса Европа Иттифоқи давлатлари раҳбарлари, шу жумладан Фридрих Мерц томонидан Пекинни танқид қилишга сабаб бўлиб келган.

ГФР канцлерининг Хитойга ташрифи арафасида ХХР ТИВ расмий вакили Мао Нин ОАВга, РФнинг Украинадаги уруши Хитой—Европа муносабатларида муаммога айланмаслиги кераклигини айтган. Мао Нин шу билан бирга журналистларнинг “Си Жинпинг Мерц билан учрашувда Хитойнинг урушдаги роли ҳақида гаплашадими?” деган саволига тўғридан тўғри жавоб бермаган.

Фридрих Мерц ХХРга расмий ташрифини йирик бизнес делегацияси ҳамроҳлигида амалга оширмоқда ва унинг Си Жинпинг билан муҳокама қилаётган асосий мавзуларидан бири Хитой—Германия иқтисодий ҳамкорлиги бўлди. Бу — Мерц учун канцлер сифатида Хитойга биринчи сафар, гарчи ташрифга тайёргарлик у лавозимга киришганидан кейинги дастлабки ойлардаёқ бошланган эди.

2025 йил якунларига кўра, Хитой ГФРнинг энг йирик савдо ҳамкорига айланган, аммо сўнгги йилларда икки давлат ўртасидаги сиёсий мулоқот унчалик яхши бўлмаган. Масалан, “светофор коалицияси”да ГФР ташқи ишлар вазири бўлган Анналена Бербок бир неча бор Хитойни танқид қилган, Си Жинпингни диктатор деб атаган, мамлакатнинг ўзига эса ЕИ ва ГФР учун рақиб деган таърифни берган.

Мерц эса, иқтисодий масалаларда ХХРга нисбатан аввалдан қаттиқ позицияда бўлганига қарамай, очиқ тўқнашувга бормаган. Ўз навбатида, Си Жинпинг Мерц канцлер этиб сайланганидан кейин уни ҳамкорликни чуқурлаштиришга ва иқтисодий глобаллашувни қўллаб-қувватлашга чақирган. Шунингдек, Хитойга сафаридан сал олдин ГФР канцлери Хитойни Германияга инвестицияларни оширишга даъват этган.