Женевада Эроннинг ядро дастури бўйича музокаралар якунланди

АҚШ ва Эрон делегациялари Теҳроннинг ядро дастури бўйича навбатдаги музокаралар раундини Женевада якунлади. Бу ҳақда 26 феврал, пайшанба куни кечқурун Вашингтон ва Теҳрон делегациялари ўртасида воситачи бўлиб келаётган Уммон вакиллари маълум қилди.

«Биз АҚШ ва Эрон ўртасидаги музокараларда сезиларли тараққиётдан кейин кунни якунладик», — деди Уммон ташқи ишлар вазири Бадр ал-Бусаидий. У шунингдек келаси ҳафта Венада музокараларнинг «техник даражада» янги босқичи бўлиб ўтишини қўшимча қилди.

АҚШ делегацияси таркибига Доналд Трампнинг махсус вакили Стивен Уиткофф ва президентнинг куёви Жаред Кушнер кирди. Учрашувда Эрон томонидан мамлакат ташқи ишлар вазири Аббос Ароғчи иштирок этди.

Axios ёзишича, томонлар 26 феврал куни эрталаб ва кечқурун икки сессияда музокара олиб борган. Нашр маълумотига кўра, эрталабки учрашувдан кейин Америка делегацияси «ҳафсаласи пир бўлган», бироқ кечки йиғилишни Уиткофф ва Кушнер «ижобий» деб баҳолаган.

Қатарнинг «Ал-Жазира» телеканали маълумотига кўра, эрталабки мажлис вақтида Эрон АҚШ билан ядро келишуви бўйича ўз лойиҳасини тақдим этган. Нашр манбалари айтишича, Теҳрон уранни бойитишни фақат вақтинча тўхтатишга тайёр ва ядро объектларини демонтаж қилишдан бош тортмоқда. Эрон ҳукумати уран захираларини паст даражагача қисқартиришга ва ядро объектларига АЭХА (Атом энергияси халқаро агентлиги) вакилларини киритишга тайёр.

CNN мухбирининг, эронлик делегацияга яқин манбаларга таяниб хабар беришича, Эрон АҚШ билан фақат барча Америка санкциялари ва БМТ Хавфсизлик кенгаши резолюциялари бекор қилинган тақдирдагина келишувга боришга тайёр. Аввалроқ шу мазмундаги баёнотни мамлакат ташқи ишлар вазири ўринбосари Мажид Тахт-Раванчи ҳам берган эди.