Кенияликларни РФ урушига ёллаш: айбланувчи қўлга олинди

Россиянинг Украинага қарши уруши учун кенияликларни ёллаш иши доирасида Кенияда 33 ёшли, одам савдоси билан шуғулланган гумонланувчи қўлга олинди. AFP агентлигига кўра, у Кениядан эркакларни Россияда ҳарбий хизматга юбориш ишидаги асосий гумонланувчилардан бири бўлиши мумкин. Гумонланувчи полиция томонидан ҳибсга олинган.

Фото: picture alliance

Кениянинг Мояле шаҳридаги (Эфиопия билан чегара ҳудуди) полиция бўлими детективлари одам савдосига алоқадорликда қидирувда бўлган 33 ёшли Фестус Арас Омвамбунни ушлади. Бу ҳақда 25 феврал, чоршанба куни Х ижтимоий тармоғида Кения Жиноий терговлар бошқармаси хабар берди. AFP агентлиги аниқлик киритишича, ушланган шахс Кениядан эркакларни Россияга ҳарбий хизматга юбориш ишидаги эҳтимолий асосий фигурант ҳисобланади.

Жиноий гуруҳ қурбонларга Европа давлатларида қонуний иш топиб беришни ваъда қилган, аммо оқибатда улар «қонуний бўлмаган ва хавфли иш»ни бажаришга мажбур бўлган — бу эса уларнинг қадр-қиммати ва хавфсизлигидан маҳрум қилган, дея билдирди бошқарма.

Фестус ҳозир полиция ҳибсида, олдинда уни суд жараёни кутиб турибди.

Reuters 19 феврал куни Кения разведкаси маълумотларига таяниб, 1000 нафардан ортиқ кениялик Россия томонидан Украинадаги урушда қатнашиш учун ёлланганини хабар қилган. Бу — ҳукумат шу пайтгача тахмин қилганидан беш баробар кўп. Кения парламенти қуйи палатаси — Миллий ассамблеяда кўпчилик етакчиси Кимани Ичунгва 18 феврал куни разведка ҳисоботини депутатларга тақдим этган.

Ҳисоботга кўра, порага оғган амалдорлар ва одам савдоси билан шуғулланувчи шахслар тармоғи рекрутларни ёллаган. Улар орасида собиқ ҳарбийлар, полициячилар ва ишсизлар ҳам бўлган. Ёлловчилар ойига тахминан 2715 доллар (2308 евро) маош ва 9309 долларгача (7916 евро) мукофот пулларини ваъда қилган.

Феврал ойи маълумотларига кўра, 89 кениялик Украина фронтида бўлган, 39 нафари касалхоналарда даволанган, 28 нафари бедарак йўқолган деб ҳисобланган.

Ҳисоботда айтилишича, кенияликлар аввал Туркия ёки БАА орқали туристик визалар билан мамлакатни тарк этган. Кейинроқ Найроби аэропортида назорат кучайтирилгандан сўнг, рекрутлар Уганда, Жанубий Африка ва Конго Демократик Республикаси орқали чиқиб кетишга ўтган. Reuters қайд этишича, ишга ёллаш агентликлари аэропорт ходимлари, иммиграция хизматлари, шунингдек Россия элчихонаси (Найроби) ва Кениянинг Москвадаги дипломатик ваколатхонасидаги айрим ходимлар билан пора асосида ҳамкорлик қилган бўлиши мумкин.

Найробидаги дипломатик миссия Россиянинг ноқонуний ёллашга алоқадорлигини рад этган. У ерда «чет элликлар РФ Қуролли кучлари сафига ихтиёрий равишда қўшилиши мумкин», деган баёнот берилган.

Украина томони 25 феврал куни маълум қилишича, РФ Қуролли кучларида Африканинг 36 мамлакатидан бўлган 1780 нафардан ортиқ шахс аниқланган. Уларнинг айримлари асирга тушган.