Netflix Warner Bros.'ни сотиб олиш бўйича келишувдан чиқмоқчи

Netflix Warner Bros. Discovery’нинг кино бизнеси ва компанияга тегишли HBO Max стриминг сервисини сотиб олиш бўйича келишувдан чиқади. Бу ҳақда 27 феврал, жума куни The New York Times Netflix’нинг икки ҳамижрочи директори Тед Сорандос ва Грег Питерснинг қўшма баёнотига таяниб хабар берди. Уларнинг айтишича, Warner Bros. Discovery Paramount томонидан киритилган контртаклифни Netflix билан 2025 йил декабрда имзолаган келишувга нисбатан фойдароқ деб топган. Ўша келишув шартларига кўра, Netflix ҳар бир акция учун 27,75 доллар тўлаши керак эди, Warner Bros. Discovery’нинг умумий қиймати эса (компания қарзлари билан бирга) 82,7 млрд долларга баҳоланган.

Аввалроқ Paramount Warner Bros. Discovery’га янги келишув таклиф қилгани ва ҳар бир акция учун 31 долларгача тўлашга тайёр эканини билдиргани маълум бўлган эди. The New York Times ёзишича, бундай контртаклифда битимнинг умумий қиймати 111 млрд доллар бўлади. Шу фондан келиб чиқиб, Warner Bros. Discovery Netflix’га Paramount таклифини «ошириш»ни таклиф қилган.

Netflix раҳбарлари ўз баёнотида энди «битим молиявий жиҳатдан аввалгидек жозибадор кўринмаётганини» таъкидлади. The Hollywood Reporter маълум қилишича, агар Paramount билан битим амалга ошса, Paramount Netflix’ка 2,8 млрд доллар миқдорида компенсация ҳам тўлайди. Бу компенсацияни эса Warner Bros. Discovery амалдаги қўшилиш бўйича келишув бекор қилиниши учун беришига тўғри келади.

Warner Bros. Discovery деярли 100 йил давомида Ҳолливудда суратга олинган филм ва сериалларнинг улкан архивига бўлган ҳуқуқларга эга. Компания шунингдек “Ҳарри Поттер”, “Узуклар ҳукмдори”, “Тахтлар ўйини” каби франшизаларга, HBO Max стриминг сервисига, CNN ва Discovery телеканалларига ҳам эгалик қилади.

Paramount конгломератига 2025 йилдан бери Эллисонлар оиласи эгалик қилади, уларни АҚШ президенти Доналд Трампга яқин, деб аташади. Ларри Эллисон — Oracle технологик корпорациясининг асосчиси, маълумотлар базалари ва булутли технологиялар бозоридаги асосий ўйинчилардан бири ҳамда АҚШ ҳукуматининг йирик пудратчиси ҳисобланади. Хусусан, Oracle Пентагон учун муҳим IT-инфратузилмаларни етказиб беради. Ларри Эллисон бир неча бор омма олдида Трампни қўллаб-қувватлагани ва унинг сайлов кампаниясига хайрия қилгани айтилган.

Эндиликда Netflix’ни сотиб олиш бўйича янги битимни антимонополия регуляторлари маъқуллаши керак бўлади. Шу ҳолда Paramount, хусусан, CNN телеканали устидан назоратни қўлга киритади. Доналд Трамп эса CNN’ни ўзи ҳақида ва маъмурияти ҳақида “фейклар” тарқатишда бир неча бор айблаган.