Paramount Warner Bros. Discovery’ни 110 млрд долларга сотиб олади

Paramount Skydance компанияси Warner Bros. Discovery’ни 110 млрд долларга сотиб олишини эълон қилди. “Paramount Skydance Corporation ва Warner Bros. Discovery, Inc. бугун Paramount WBD’ни сотиб олишига мувофиқ бирлашиш бўйича якуний келишув тузилганини эълон қилди”, — дейилади Paramount сайтида 27 феврал, жума куни эълон қилинган пресс-релизда.

Кеча Netflix стриминг компанияси 2025 йил декабрида тузилган Warner Bros. Discovery’ни 82,7 млрд долларга сотиб олиш ҳақидаги келишувдан чиқишга қарор қилгани маълум бўлди. Жорий йил феврал ойида Paramount Warner Bros. Discovery’га компанияларни бирлаштириш бўйича янада фойдали шартларни таклиф қилган. Шундан кейин Netflix актив учун курашни давом эттиришдан воз кечган.

Янги келишув шартларига кўра, Paramount Warner Bros. Discovery’нинг муомаладаги ҳар бир акцияси учун 31 доллар тўлайди ва компания қарзларини ўз зиммасига олади. Бу қарзлар қаторига Netflix’га амалдаги бирлашиш шартномаси бекор қилингани учун 2,8 млрд доллар компенсация тўланиши ҳам киради.

Reuters агентлиги ёзишича, Paramount ва Warner Bros. Discovery директорлар кенгашлари битимни якдил маъқуллаган. Келишув 2026 йилнинг учинчи чорагида ёпилиши (яъни расман якунланиши) кутилмоқда.

Warner Bros. Discovery +олливудда қарийб 100 йил давомида суратга олинган филм ва сериалларнинг улкан архивига бўлган ҳуқуқларга эга. Компания, шунингдек, “+арри Поттер”, “Узуклар ҳукмдори”, “Тахтлар ўйини” каби франшизаларга, HBO Max стриминг хизматига, CNN ва Discovery телеканалларига ҳам эгалик қилади. Paramount бош директори Дэвид Эллисон икки “жаҳон даражасидаги студия”ни бирлаштириб, компания “томошабинлар, ҳамкорлар ва акциядорлар учун янада каттароқ қиймат” яратишини билдирди.

Paramount конгломератига 2025 йилдан бери АҚШ президенти Доналд Трампга яқин деб аталадиган Эллисонлар оиласи эгалик қилади. Ларри Эллисон — маълумотлар базалари ва булутли технологиялар бозоридаги асосий ўйинчилардан бири бўлган ва АҚШ ҳукумати учун йирик пудратчи ҳисобланадиган Oracle технологик корпорациясининг асосчиси. Хусусан, Oracle Пентагон учун муҳим IT-инфратузилмани етказиб беради.

Warner Bros. Discovery’ни сотиб олиш бўйича янги битимни энди антимонополия регуляторлари маъқуллаши керак. Агар шундай бўлса, Paramount, жумладан, CNN телеканали устидан назоратни ҳам қўлга киритади. Доналд Трамп бу телеканални бир неча бор ўзи ва маъмурияти ҳақида “фейк”лар тарқатишда айблаб келган.