Netflix'га рақобат: Paramount WBD учун 108 млрд долларлик таклиф тайёрлади

Душанба куни, 22 декабрда, Paramount Skydance Corp. компанияси Warner Bros. Discovery (WBD)ни сотиб олиш бўйича таклифининг шартларини қайта кўриб чиққани маълум бўлди. Янгиланган таклифга Oracle ҳаммуассиси, миллиардер Ларри Эллисон томонидан 40,4 млрд доллар миқдоридаги шахсий, қайтариб олинмайдиган молиявий кафолат киритилди. Бу ҳақда Paramount’нинг расмий баёнотида айтилган. Ларри Эллисоннинг ўғли — кинопродюсер Дэвид Эллисон Paramount Skydance Productions раҳбари ҳисобланади.

Сотиб олиш бўйича таклифни тузатиш WBD директорлар кенгашининг эътирозларига жавоб бўлди: кенгаш Paramount’нинг аввалги аризасини ҳаддан ташқари хатарли деб баҳолаган ва олдинги кафолат — Эллисонлар оиласининг қайтариб олиниши мумкин бўлган оилавий трасти орқали берилаётгани активларнинг чиқиб кетиши эҳтимолини истисно этмаслиги, шу сабабли ишончли молиялаштириш манбаси сифатида қаралмаслигини билдирган эди. Янги таклифда Эллисон битимни молиялаштириш ва Paramount’га бўлиши мумкин бўлган даъволарни қоплашни шахсан ўз зиммасига олди. Миллиардер, шунингдек, битим якунланмагунча трастни қайтариб олмасликни ваъда қилди.

Paramount таклифининг умумий қиймати 108 млрд долларга етади. Рақобатчи Netflix таклифи эса Warner Bros. Discovery активларини тахминан 83 млрд долларга баҳолайди ва фақат Warner Bros. киностудиялари, HBO, HBO Max ҳамда ўйин (gaming) бўлинмасини сотиб олишни назарда тутади. Paramount эса WBD’ни, жумладан, CNN, TNT, TBS ва Discovery каби глобал телеканаллар тармоғини ҳам тўлиқ харид қилишни режалаштирмоқда.

Paramount таклифини молиялаштиришда хорижий инвесторлар ҳам иштирок этмоқда: тахминан 24 млрд долларни Саудия Арабистони, Қатар ва Абу-Дабининг суверен жамғармалари таъминламоқда. WBD аввалроқ хорижий жамғармалар иштирок этиши АҚШ ҳукумати томонидан миллий хавфсизлик йўналишида қўшимча текширувларга сабаб бўлиши мумкинлигини таъкидлаган.

Warner Bros. устидан назорат учун Netflix ва Paramount ўртасидаги кенг кўламли кураш аллақачон Оқ уй эътиборини тортган. АҚШ президенти Доналд Трамп бир неча бор вазиятни шарҳлаб, Netflix’нинг WBD’ни сотиб олиши “муаммо бўлиши мумкин”лигини айтган — чунки бу компаниянинг кино ва ТВ индустриясидаги улушини сезиларли оширади. Шу билан бирга, у Paramount’га тегишли CBS News телеканалларининг Оқ уй фаолиятини ёритишини танқид қилиб келади ва даъвогарларнинг ҳеч бирини тўлиқ қўллаб-қувватламаслигини бир неча бор таъкидлаган. У айниқса CNN эгаси алмашиши зарурлигига эътибор қаратган — Трамп бу канални кўп бор “фейк янгиликлар” тарқатишда айблаган.

Netflix ҳам, Paramount ҳам Оқ уйда ўз позицияларини фаол тарзда илгари сурмоқда. Масалан, Дэвид Эллисон CBS’нинг янги бош муҳаррири этиб ОАВдаги бирёқламаликни танқид қилиши билан танилган журналист Бари Вайсни тайинлади. Унинг тайинланиши АҚШнинг консерватив доираларида юқори баҳоланди. Шу фонда CBS News ичида можаро келиб чиқди: ходимлардан бири Вайсни Эл-Сальвадордаги ўта қаттиқ даражада қўриқланадиган қамоқхона ҳақидаги лавҳани эфирдан олиб ташлаганликда айблади — у ерга Трамп маъмурияти Венесуэладан юзлаб муҳожирларни юборган эди.

Янгиликлар эълон қилинганидан сўнг Paramount акциялари тахминан 5,5 фоизга, WBD қимматли қоғозлари 4,3 фоизга ўсди, Netflix котировкалари эса тахминан 1 фоизга пасайди.