Эрон узоқ вақтдан бери Украинанинг душманига айланган – Зеленский

Украина президентининг эслатишича, Эрон узоқ вақтдан бери Россиянинг иттифоқчиси бўлиб келган ва «Россияга дронларни оммавий равишда етказиб бермоқда».

Фото: Украина президенти матбуот хизмати

2022 йилда «Шоҳид» дронларининг Украинага биринчи зарбалари эронлик операторлар томонидан берилган, чунки шу пайтда Россияда бундай ходимлар йўқ эди, деди Украина президенти Володимир Зеленский.

Хусусан, Зеленский «Шоҳид»ларга қарши курашувчи украиналик мутахассислар Яқин Шарққа юборилганидан кейин Украина Эрон учун душманга айланмайдими, деган саволга жавоб берди.

Президентнинг эслатишича, Эрон узоқ вақтдан бери Россиянинг иттифоқчиси бўлиб келган ва «Россияга дронларни оммавий равишда етказиб бермоқда». Шунингдек, Эрон Яқин Шарқдаги ҳозирги уруш бошланишидан олдин ҳам Россияга артиллерия снарядлари ва ракеталар берган.

«Шимолий Корея Россияга 6-7 миллион артиллерия [снарядлари] берган, Эрон менимча, 150 минг, тахминан, бир неча юз минг снаряд берган, аммо ракеталар ҳам берган. Шунингдек, лицензия ҳам берган», деди Зеленский.

Шу билан бирга, давлат раҳбари Россия босқинининг биринчи йилидаёқ Эрон Украинага қарши урушда бевосита иштирок этганини эслатди.

«Биз биринчи «Шоҳид»лар қандай учирилганини биламиз. Россиялик операторлар йўқ эди, бошқа мамлакат операторлари бор эди. Эронликлар узоқ вақтдан бери ҳужжатларда ҳам, реал ҳаракатларда ҳам Россиянинг иттифоқчилари бўлиб келган», деди Зеленский.