Трамп: Зеленский билан келишиш Путинга қараганда қийинроқ

АҚШ президенти Доналд Трамп яна бир бор Украина президенти Володимир Зеленскийни танқид қилди ва у тинчлик келишувини тузишга интилмаяпти, деди.

“Мен Зеленский битим тузишни истамаётганидан ҳайронман. Зеленскийга айтинглар, битим тузсин, чунки Путин битим тузишга тайёр”, — деди Трамп 15 март, якшанба куни эълон қилинган NBC News’га берган интервюсида.

Америка президентининг сўзларига кўра, Зеленский билан “анча қийинроқ келишиш” мумкин, Путин билан эса бу осонроқ. Трамп, шунингдек, Зеленскийнинг АҚШ ва унинг иттифоқчиларига Яқин Шарқда Эрон дронларини тутиб қолишда ёрдам бериш таклифини ҳам рад этди.

“Бизга ёрдами керак бўлмаган энг охирги одам — бу Зеленский”, — деди Америка президенти.

Россия, Украина ва АҚШ ўртасидаги музокараларнинг сўнгги босқичи 17–18 феврал кунлари Женевада бўлиб ўтган эди. Кейинги учрашув март бошида Абу-Дабида режалаштирилган, аммо 28 феврал куни АҚШ ва Исроил Эронга қарши уруш бошлади.

Зеленский Киев янги музокаралар босқичига тайёр эканини билдириб, 18–19 март кунлари учрашув ўтказишни таклиф қилди, аммо жой келишиб олинмади: Америка томони учрашув ўз ҳудудида — Майами ёки Вашингтонда ўтишини талаб қилди. Зеленский бунга рози бўлди. Ўз навбатида, Россия Туркия ёки Швейцарияни таклиф қилди, аммо америкаликлар Яқин Шарқдаги уруш уларга ўз мамлакат ҳудудидан ташқарига чиқишга имкон бермаётганини важ қилиб, буни рад этди.

Ҳўрмуз бўғозининг амалда ёпилиши фонида — бу жаҳон нефт таъминоти ва денгиз орқали экспорт қилинадиган суюлтирилган табиий газнинг 20 фоизгачаси ўтадиган асосий йўналиш ҳисобланади — Brent маркасидаги нефт нархи бир баррел учун 120 долларгача кўтарилди. Трамп 12 мартгача кемаларга юкланган Россия нефтини харид қилишга вақтинча рухсат берди. У NBC’га берган интервюсида нефт инқирози тугаши билан Россияга қарши санкциялар “қайтарилишини” ваъда қилди.