Венгрия пойтахтида сайловлар олдидан оммавий митинглар ўтказилди

Венгрия бош вазири Виктор Орбан ва унинг асосий рақиби, Венгриянинг “Ҳурмат ва эркинлик” (TISZA) мухолифат партияси раҳбари, Европарламент депутати Петер Мадяр 15 март, якшанба куни миллий байрам муносабати билан Будапештда йирик митинглар ўтказди. Ҳар икки акция мамлакатдаги парламент сайловларига бир ой қолган пайтда қайси томон кўпроқ қўллаб-қувватланаётганининг ўзига хос кўрсаткичи сифатида баҳоланмоқда.

Венгрияда овоз бериш 12 апрелга белгиланган бўлиб, у Орбан учун 2010 йилда ҳукумат раҳбари бўлганидан бери ҳокимиятига бўлган энг жиддий синов деб аталмоқда. Ҳозирда TISZA партияси сўровларнинг аксариятида Орбан бошчилик қилаётган “FIDESZ — Венгрия фуқаролик иттифоқи” партиясини ортда қолдирмоқда.

Венгрия парламенти олдида ўтказилган “Тинчлик марши”да сўзга чиққан Орбан ўз тарафдорларини овоз беришда фаол бўлишга чақирди ва бу сайловни “тарихий” деб атади. У ҳукмрон партия 2022 йилги сайловлардаги натижасидан ҳам юқори кўрсаткичга эришиши кераклигини таъкидлади.

“Биз тўрт йил олдингидай эмас, ундан ҳам яхшироқ ғалаба қилишимиз керак. Бизга кўпроқ овоз керак”, — дея унинг сўзларини Reuters агентлиги келтирган.

Венгрия ҳукумати раҳбари бўлажак сайловларни, шунингдек, “уруш ва тинчлик ўртасидаги танлов” сифатида ҳам тақдим этди ва рақибларини Венгрияни Украинадаги урушга тортишга уринаётганликда айблади. У, шунингдек, мамлакат суверенитетини ташқи босимлар, жумладан Брюссел босими қаршисида ҳам ҳимоя қилишини айтди.

Венгрия бош вазири Виктор Орбан тарафдорларининг Будапештдаги “Тинчлик марши”даги плакатларида “Биз Украина мустамлакасига айланмаймиз” ва “Урушни тўхтатинг” деган ёзувлар, шунингдек, Украина президенти Володимир Зеленский ва мухолифат етакчиси Мадярнинг суратлари акс этган эди. Бош вазирнинг айтишича, ушбу митинг ўз турида энг йириги бўлган ва парламент ёнидаги майдонни тўлдирган.

Петер Мадяр Орбаннинг кампаниясини “кулгили тарғибот” деб атади. Қаҳрамонлар майдонидаги чиқиши давомида у Венгрия Европа Иттифоқи ва НАТО таркибида қолиши кераклигини таъкидлади.

“Ҳокимиятни ҳар қандай баҳога бўлса ҳам сақлаб қолиш — ҳозир у учун (Орбан учун — таҳр.) энг муҳим нарса. Урушни қўзғатиш, уруш билан таҳдид қилиш, урушни алангалатиш. Бу унинг венгер халқига қарши энг кучли қуролидир”, — деди у.

Мадяр, шунингдек, Орбанни “сайловларга аралашиш” учун “рус агентларини таклиф қилиш” орқали Венгрия эркинлигини чеклашга уринаётганликда айблади. AFP журналистлари маълумотига кўра, ҳар икки митингда ҳам ўн минглаб одамлар қатнашган.