Киев Яқин Шарққа 200 дан ортиқ ҳарбий эксперт юборди

Украина президенти Володимир Зеленский 17 март, сешанба куни Буюк Британия парламентидаги нутқи чоғида ҳозирда Яқин Шарқ мамлакатларида 201 нафар украиналик ҳарбий эксперт борлиги, яна 34 нафари эса “жойлаштиришга тайёр” эканини маълум қилди.

Унинг сўзларига кўра, гап Россия Украинага мунтазам ҳужум қилишда қўллаётган Shahed туридаги дронлардан қандай ҳимояланишни биладиган ҳарбий мутахассислар ҳақида кетмоқда.

“Бизнинг гуруҳларимиз аллақачон БАА, Қатар ва Саудия Арабистонига етиб борди, шунингдек Кувайтга ҳам йўл олмоқда. Биз бошқа мамлакатлар билан ҳам ишлаяпмиз, келишувлар аллақачон тузилган. Биз Эрон террорининг қўшни давлатларга қарши давом этишини истамаймиз”, — деди Зеленский.

У яна таъкидлашича, экспертларни юбориш ҳақидаги қарор Украина шериклари, жумладан АҚШнинг сўровига жавобан қабул қилинган.

Шу билан бирга, Зеленский иттифоқчиларни Яқин Шарқдаги уруш фонида Украинасини унутмасликка чақирди ва Россия ҳамда Эрон ўртасидаги ҳамкорлик туғдираётган таҳдид ҳақида огоҳлантирди.

“Россия ва Эрондаги режимлар — нафрат бўйича ака-ука, шунинг учун ҳам улар қурол бўйича ҳам ака-укадир. Биз эса нафрат асосида қурилган режимлар ҳеч қачон ғалаба қозонмаслигига интиламиз”, — деди у.

Буюк Британия бош вазири Кир Стармер эса ўз навбатида Эрондаги уруш Украинадаги урушдан эътиборни чалғитишига йўл қўймаслигини ваъда қилди.

Лондондаги музокаралар якунларига кўра, Стармер ва Зеленский хавфсизлик ва мудофаа соҳасида кучайтирилган ҳамкорлик тўғрисидаги декларацияни имзолади. Бу ҳақда Буюк Британия ҳукумати матбуот хизмати хабар қилди.

Декларацияда мамлакатлар қўшма мудофаа-саноат ва технологик экотизимни ривожлантириш устида ишлаши қайд этилган. Ҳамкорлик доирасида ишлаб чиқариш линияларини яратиш, тадқиқот ва ишланмалар олиб бориш, мудофаа маҳсулотлари таъминот занжирларини интеграция қилиш ҳамда саноат шерикликларини ривожлантириш назарда тутилиши мумкин.

Британия ҳукумати пресс-релизида шундай дейилган: “Бу ҳамкорлик Украина нафақат агрессиядан ҳимояланаётган давлат, балки ўз шериклари хавфсизлигига ҳисса қўшаётган ва Европанинг жамоавий мудофаасини мустаҳкамлаётган давлат экани ҳақидаги умумий тушунчани акс эттиради”.