Куба президенти агрессорга қаршилик кўрсатишга тайёрлигини эълон қилди

АҚШ президенти Доналд Трамп Кубани “қўлга киритиши” мумкинлигини айтганидан сўнг, ушбу мамлакат президенти Мигел Диас-Канел “қатъий қаршилик” кўрсатишга тайёр эканини билдирди.

“Энг ёмон сценарийга дуч келсак ҳам, Куба бир нарсага амин: ҳар қандай ташқи агрессор қатъий қаршиликка учрайди”, — деб ёзди Диас-Канел 17 март, сешанба куни X микроблогида.

AFP агентлиги қайд этишича, АҚШ томонидан давом этаётган нефт блокадаси фонида, бу эса Кубадаги иқтисодий ва энергетик инқирозни янада кучайтирган, орол давлати ҳукумати ортиб бораётган босимга дуч келмоқда. 16 март куни оролда миллий миқёсдаги блэкаут юз берди, натижада мамлакатнинг барча аҳолиси — 10 миллион киши электр таъминотисиз қолди. 17 март тонгига келиб, мамлакат аҳолисининг учдан икки қисмига, жумладан 1,7 миллион аҳоли яшайдиган пойтахт Ҳавана аҳолисининг 45 фоизига электр энергияси етказиб бериш қайта тикланган.

The New York Times газетаси 16 март куни ёзишича, Доналд Трамп шу куни журналистлар билан мулоқотда “Кубани қўлга киритиш шарафига муяссар бўлишини” айтган.

“Кубани қўлга киритиш. Яъни, уни озод қилиш, қўлга киритишни назарда тутяпман. Ўйлайманки, у билан истаган ишимни қила оламан. Ҳозир у жуда заиф мамлакат”, — дея газета Оқ уй раҳбарининг сўзларини келтирган.

16 март куни эрталаб эълон қилинган NBC News телеканалига интервюсида Куба бош вазири ўринбосари Оскар Перес-Олива Ҳавана “АҚШ компаниялари, шунингдек АҚШда яшовчи кубаликлар ва уларнинг авлодлари билан мослашувчан савдо муносабатларига тайёр” эканини айтди.

Бироқ АҚШ давлат котиби Марко Рубио бу ён беришни Трамп маъмурияти Кубада кўришни истаган эркин бозор ислоҳотлари учун етарли эмас, деб атади.

“Улар кеча (16 март куни — таҳр.) эълон қилган нарса етарлича кескин эмас. Бу ёрдам бермайди. Демак, улар олдида бир нечта йирик қарорларни қабул қилиш вазифаси турибди”, — деди АҚШ Давлат департаменти раҳбари Оқ уйда журналистлар олдида чиқиш қилиб.

AFP агентлиги эслатишича, Рубионинг ўзи кубалик илдизларга эга, аммо у орол давлатидаги коммунистик ҳукуматнинг кескин танқидчисидир.

Кубанинг Вашингтондаги дипломатик миссияси раҳбари ўринбосари Танерис Диегес 17 март куни AFP агентлигига берган интервюсида Куба ва АҚШнинг “муҳокама қилиши мумкин бўлган масалалар бор”лигини айтди, аммо ҳеч бир давлат бошқасидан ҳукуматни ўзгартиришни талаб қилмаслиги кераклигини таъкидлади.

“Бизнинг сиёсий тизимимизга тааллуқли ҳеч нарса, сиёсий моделимиздан ҳеч нарса — конституциявий моделимиздан ҳеч нарса музокаралар мавзусига кирмайди ва ҳеч қачон кирмайди ҳам”, — деди дипломат.

“Куба ҳар қандай мулоқотни олиб бориш учун фақат бир нарсани сўрайди: бизнинг суверенитетимиз ва ўз тақдиримизни ўзимиз белгилаш ҳуқуқимизга ҳурмат”, — дея қўшимча қилди у.