Эстония Россияни ҳаво ҳудудини бузишда айблади

Россиянинг Су-30 қирувчиси Болтиқ денгизидаги Вайндлоо ороли ҳудудида Эстония ҳаво маконини бузди. Бу ҳақда мамлакат Бош штаби 19 март, пайшанба куни маълум қилди. Уларнинг маълумотига кўра, ҳодиса бир кун аввал, 18 март куни куннинг иккинчи ярмида содир бўлган. Россия ҳарбий самолёти Эстония осмонида тахминан бир дақиқа бўлган, шу билан бирга у учиш режасига эга бўлмаган ва Эстония авиация хизмати билан радиоалоқани сақламаган.

Ҳаво чегарасининг бузилишига НАТОнинг Болтиқбўйи давлатлари ҳаво ҳудудини қўриқлаш миссияси доирасида Эмари авиабазасида жойлашган Италия Ҳарбий-ҳаво кучлари бўлинмаси жавоб қайтарган, деб хабар берди Эстония телерадиокомпанияси ERR.

“Эстония хавфсизлигига таҳдид бўлмади”, — деди ушбу Болтиқбўйи мамлакатининг ташқи ишлар вазири Маргус Цахкна. Эстония Ташқи ишлар вазирлиги Россия элчихонасининг вақтинчалик ишлар вакилини чақиртирди ва ҳодиса муносабати билан унга норозилик нотасини топширди.

Эстония бош вазири Кристен Михал X ижтимоий тармоғида Россиянинг хатти-ҳаракат услуби ўзгармаётганини ёзди.

“НАТО ишлаяпти. Бизнинг ҳаво ҳудудимиз доимий равишда кузатиб борилади, қўриқланади ва ҳимоя қилинади”, — дея таъкидлади Михал.

2025 йил давомида Россия ҳарбий самолётлари қўшни мамлакат ҳаво ҳудудини камида тўрт марта бузган. Бундай сўнгги ҳолат 19 сентябр куни содир бўлган — ўшанда Россия Ҳарбий-космик кучларига тегишли учта МиГ-31 қирувчиси рухсатсиз равишда ўша Вайндлоо ороли яқинидаги Эстония осмонида 12 дақиқа бўлган.

Бу ҳодисани Европа Иттифоқи, Франция, Буюк Британия ва Германия қоралаган. Германия ташқи ишлар вазири Йоханн Вадефул Россия томонидан ҳаво ҳудудининг бузилишини “қабул қилиб бўлмайдиган ҳолат” деб атаган.

“Ҳушёрлик — эркинликнинг баҳоси”, — деб ёзди Вадефул X ижтимоий тармоғида. Унинг таъкидлашича, НАТОнинг бу тамойили ҳозир ҳам долзарблигини йўқотмаган.

Европалик сиёсатчилар томонидан янада кескинроқ изоҳлар ҳам янгради. Жумладан, Чехия президенти Петр Павел 20 сентябр куни НАТО ҳаво ҳудудига босқин қилинган тақдирда Россия самолётлари уриб туширилиши мумкинлигини айтди ва шундай қўшимча қилди: “Буни ҳеч ким истамайди”.

Худди шундай фикрни ХДИ/ХСИ блоки парламент фракциясининг ташқи сиёсат бўйича эксперти Юрген Хардт ҳам билдирди. Германиялик сиёсатчининг сўзларига кўра, Россиянинг провокациялари Ғарб уларга “аниқ жавоб қайтаргандагина” тўхтайди.