Трамп: АҚШ Эронга қарши кенг кўламли операцияларни қисқартириши мумкин

АҚШ ҳарбийлари Эрон билан урушда ўз мақсадларига эришишга “жуда яқин қолди”, шу муносабат билан Вашингтон Теҳронга нисбатан “Яқин Шарқдаги кенг кўламли ҳарбий операцияларни қисқартириш имкониятини кўриб чиқмоқда”. Бу ҳақда АҚШ президенти Доналд Трамп 20 март, жума куни Truth Social ижтимоий тармоғида ёзди.

У Америка кампаниясининг мақсадлари қаторида Эроннинг ракета салоҳиятини, учириш қурилмаларини “ва улар билан боғлиқ барча нарсани” йўқ қилишни, шунингдек Эроннинг мудофаа-саноат базасини бартараф этишни санаб ўтди; унинг ҳарбий-денгиз ва ҳарбий-ҳаво кучларини, “жумладан зенит қуролларини” йўқ қилишни, Ислом Республикасининг ядросиз мақомини таъминлашни ва Яқин Шарқдаги Америка иттифоқчилари — Исроил, Саудия Арабистони, Қатар, БАА, Баҳрайн, Кувайт ва бошқа мамлакатларни ҳимоя қилишни қайд этди.

Шу хабарнинг ўзида Доналд Трамп уруш бошланганидан бери Эрон томонидан тўсиб қўйилган Ҳўрмуз бўғози “ундан фойдаланадиган бошқа давлатлар томонидан, зарурат бўлса, қўриқланиши ва назорат қилиниши керак”, АҚШ эмас, деб баёнот берди.

“Агар биздан сўрашса, биз бу давлатларнинг Ҳўрмуз бўйича ҳаракатларига ёрдам берамиз, аммо Эрон томонидан келаётган таҳдид бартараф этилганидан кейин бунинг зарурати бўлмаслиги керак. Энг муҳими, улар учун бу енгил ҳарбий операция бўлади”, — дея давом этди сиёсатчи.

Бундан атиги бир неча соат олдин Трамп АҚШсиз НАТОни “қоғоздаги йўлбарс” деб таърифлаган ва алянс бўйича иттифоқчиларни “қўрқоқлар” деб атаган эди. Унинг айтишича, улар “тўлашга мажбур бўлаётган юқори нефт нархларидан шикоят қилади, аммо ‘хатарлар паст’ бўлишига қарамай, Ҳўрмуз бўғозини очишга ёрдам беришни истамайди”.

Шу куни аввалроқ журналистлар саволларига жавоб берар экан, Оқ уй раҳбари Эрон билан ўт очишни тўхтатишни истамаслигини айтди, чунки Трампнинг сўзларига кўра, Эронда “на флот, на ҳарбий-ҳаво кучлари, на бирор техника” қолган.

“Биз музокара олиб боришимиз мумкин эди, аммо мен сулҳ эълон қилишни истамайман. Ахир, рақибни том маънода йўқ қилаётган пайтда сулҳ эълон қилинмаслигини тушунасиз-ку”, — деб изоҳ берди у.