Трамп Роберт Мюллернинг ўлимига муносабати билан шов-шув уйғотди

АҚШ президенти Доналд Трамп Оқ уй раҳбари сифатидаги биринчи муддатида унинг сайлов кампаниясининг Россия билан эҳтимолий алоқаларини тергов қилган собиқ махсус прокурор Роберт Мюллернинг ўлимига мамнунлик билан муносабат билдирди.

“Роберт Мюллер ҳозиргина вафот этди. Яхши, унинг ўлганидан хурсандман. У энди бегуноҳ одамларга зарар етказа олмайди!” — деб ёзди Трамп 21 март, шанба куни Truth Social ижтимоий тармоғида.

Собиқ махсус прокурор 82 ёшида вафот этди. Ҳозирча ўлим сабаби маълум қилинмаган. Мюллер узоқ вақт давомида Паркинсон касаллигидан азият чеккан.

2001–2013 йилларда Роберт Мюллер Федерал тергов бюроси (ФТБ) директори лавозимида ишлаган.

2017 йилда АҚШ Адлия вазирлиги уни 2016 йилги президентлик сайловларига Россиянинг эҳтимолий аралашувини тергов қилиш учун махсус прокурор этиб тайинлаган эди. Ўша сайловларда Трамп ғалаба қозонган.

2019 йил март ойи охирида Мюллер ишининг натижалари АҚШда ошкор қилинди, аммо фақат қисман. Ўша пайтда АҚШ бош прокурори ва адлия вазири лавозимида бўлган Уилям Барр Конгрессда Мюллер терговининг қисқача натижаларини тақдим этар экан, Трампни Россия билан алоқалар бўйича айбсиз деб ҳисоблашини билдирган.

Роберт Мюллернинг ўзи эса кейинчалик унинг жамоаси тўплаган фактлар бу масала бўйича якуний хулоса чиқаришга имкон бермаслигини таъкидлаган.

Оқ уйнинг собиқ раҳбари Барак Обама, Мюллер ФТБга раҳбарлик қилган даврда президент бўлган сиёсатчи сифатида, уни ташкилот тарихидаги “энг яхши директорлардан бири” деб атади.

“Айнан унинг қонун устуворлигига бўлган тинимсиз садоқати ва асосий қадриятларимизга бўлган мустаҳкам ишончи уни замонамизнинг энг ҳурматли давлат хизматчиларидан бирига айлантирган”, — деб қўшимча қилди Обама.

Собиқ президент, республикачи кичик Жорж Буш, ўз вақтида Мюллерни махсус прокурор лавозимига тавсия қилган сиёсатчи сифатида, унинг вафотидан “чуқур қайғуда” эканини билдирди ва Мюллерни “бутун умрини давлат хизматига бағишлагани” учун мақтади.