Украина ҳақидаги сўзларидан кейин Дитер Болен Литвада концертсиз қолди

Modern Talking гуруҳининг собиқ аъзоси Дитер Боленнинг Литвадаги концертлари ўтказилмайди. Бунга Боленнинг интервюлари сабаб бўлган бўлиши мумкин. Уларда у Германия ва Россияни “орзудаги жамоа” деб атаган, санкцияларни танқид қилган ва Украинада “имкон йўқ”лигини айтган.

Фото: picture alliance

Литвада немис гуруҳи Modern Talking'нинг собиқ иштирокчиси Дитер Боленнинг 20 ва 21 ноябр кунлари Клайпеда ва Каунас шаҳарларида бўлиб ўтиши керак бўлган концертлари бекор қилинди. Концертлар ҳафта бошида эълон қилинган эди, аммо 20 март, жума куни улар ҳақидаги маълумотлар майдончалар ва чипта сотуви сервислари сайтларидан йўқолиб қолди. Бу ҳолатга Литва миллий телерадиокомпанияси LRT эътибор қаратди.

“Биз ташкилотчилар билан маслаҳатлашдик ва шундай тадбир бизнинг аренада ўтказилмаслиги керак, деган келишувга келдик”, — деб LRT Каунасдаги “Жалгирис-Арена” тадбирларни ташкил этиш бўлими раҳбари Мантас Ведриккас сўзларини келтиради.

Расман ташкилотчилар концертларни бекор қилиш сабабини айтмаган. Аммо LRT ёзишича, бу қарор Боленнинг Германия ва Россия муносабатларининг совишини танқид қилгани ва Россиядан энергетика ресурсларини сотиб олишга чақиргани билан боғлиқ бўлиши мумкин.

“Россия ва Германия, аслида, орзудаги жамоа эди, чунки бизда арзон энергия бор эди, ишлар жуда яхши кетаётганди. Соф иқтисодий нуқтаи назардан шундай эди: бирида битта нарса бор, бошқасида бошқа нарса. Бу бироз Modern Talking'га ўхшайди. Бундан ахлоқий сабабларга кўра воз кечилди”, — деган у, хусусан, ноябр ойида немис инфлюенсери Доминик Кеттнернинг YouTube каналига берган интервюсида.

Уч йил аввал ҳам мусиқачи Ғарб давлатлари Россиянинг Украинага қарши тўлиқ миқёсли ҳарбий босқини сабаб жорий қилган санкцияларини танқид қилган ва Россия президенти Владимир Путин билан мулоқот қилишга чақирган.

Яқинда эса мусиқачи “Украинанинг Россияга қарши имкони йўқ” деб айтган, дея қайд этади LRT.

Болен Россиянинг Украинага қарши урушига қарши эканини бир неча бор таъкидлаган бўлса-да, у Киевга қурол-яроғ етказиб беришга қарши чиқмоқда. Унинг фикрича, “танклар билан дунёни урушдан халос қилиб бўлмайди”.

Бу баёнотлар кўплаб немис сиёсатчилари ва жамоат арбоблари томонидан кескин танқид қилинган. Шу билан бирга, мусиқачини ўнг популистик “Германия учун муқобил” партияси қўллаб-қувватлаган.