Apple компанияси iPhone смартфонлари дизайнини кескин ўзгартириши кутилмоқда

Шу йилнинг кузидаёқ букланадиган биринчи iPhone тақдим этилиши мумкин. Шунингдек, бутун олд панелни эгаллайдиган рамкасиз дисплейли модел тайёрланмоқда.

Фото: MacRumors

Apple инсайдларига ихтисослашган Bloomberg шарҳловчиси Марк Гурманнинг маълум қилишича, компания iPhone смартфонларининг тарихдаги «энг йирик янгиланишини» тайёрламоқда. Бу бир вақтнинг ўзида машҳур смартфоннинг ташқи кўриниши ва шаклини ўзгартирадиган бир нечта туб ўзгаришларни ўз ичига олади.

Apple шу йилнинг кузидаёқ ўзининг букланадиган биринчи iPhone моделини тақдим этиши кутилмоқда - бу Samsung Z Fold смартфонига ўхшаш дисплейли қурилма. Бундай смартфон видео, ўйинлар ва бошқа вазифалар учун катта ички панелни тақдим этади.

Гурман хусусиятлар ҳақида батафсил маълумот бермади, бироқ iOS 27 букланадиган форматга мўлжалланган биринчи мобил операцион тизим бўлишини таъкидлади. Тизим иловаларни бир-бирига яқин жойлаштириш имконини беради, бу эса интерфейсни катта дисплей майдонига мослаштиради.

Дастлаб, қурилма букилган жойида сезиларли бурмасиз такомиллаштирилган шарнирга эга бўлиши тахмин қилинган эди, аммо кейинчалик Apple муҳандислари бурмани бутунлай йўқ қилмасдан, фақат сезиларли даражада камайтиришга муваффақ бўлди.

Келгуси йилда, iPhone смартфонининг 20 йиллиги (2007-2027) муносабати билан Apple бутун олд панелни эгаллайдиган рамкасиз дисплейли моделни тақдим этмоқчи - олд камера экран остида жойлашади.

Аввалроқ Apple Стив Жобс орзу қилган тўлиқ «рамкасиз айфон» ишлаб чиқарилишини очиқ тасдиқлаган эди. Ўтган йиллар давомида Apple бу мақсадга эришишда муваффақиятга эришди: дастлаб рамкасиз дисплейли iPhone Х, кейин iPhone 14 Pro моделида «қош» ўрнини Dynamic Island эгаллади, ўтган йили эса 5,6 мм қалинликдаги корпусга эга iPhone Air чиқди.

Apple 2027 йилга бориб, технологияни оммавий ишлаб чиқаришга етказишга улгурадими ёки йўқми, ҳозирча номаълум, аммо агар бу амалга ошса, бу ҳақиқатан ҳам гаджетлар оламида муҳим воқеага айланади, деб ёзди Гурман.

Барча миш-мишлар ва сизиб чиқишлар шуни кўрсатадики, Apple асосий iPhone 18 сотувини 2027 йилгача кечиктирган. Жорий йил кузида компания iPhone 18 Pro, iPhone 18 Pro Max ва букланадиган iPhone моделини тақдим этиши кутилмоқда.