АҚШ десантлари Яқин Шарққа етиб келди

Гуруҳ таркибидан 3500га яқин денгизчи ва денгиз пиёдалари ҳамда транспорт ва қирувчи самолётлар, десант воситалари ва бошқа техникалар ўрин олган.

Фото: U.S. Central Command

Tripoli десант кемасида 3,5 минг нафарга яқин Америка денгизчилари ва денгиз пиёда қўшинлари Яқин Шарққа етиб келди, деб хабар берди АҚШ қуролли кучлари марказий қўмондонлиги (CENTCOM) матбуот хизмати.

Маълумот берилишича, кема Tripoli десант гуруҳининг яловбардори ҳисобланади.

«Гуруҳ таркибига 3500га яқин денгизчи ва денгиз пиёдалари ҳамда транспорт ва қирувчи самолётлар, десант воситалари ва бошқа техникалар киради», — дейилади хабарда.

26 март куни The Wall Street Journal конгрессдаги манбаларига таяниб «яқин вақт ичида» АҚШнинг Эронга қарши қуруқликдаги операцияси бошланиши ҳақида хабар берганди.

Газетанинг ёзишича, АҚШ денгиз пиёдаларидан Эроннинг жанубий соҳилидаги бир ёки бир нечта оролни эгаллашда фойдаланиши мумкин.

Тайёрлаган Дилшодбек Асқаров

#АҚШ #десант #Яқин Шарқ

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.