Путин ва миллиардерларнинг ёпиқ учрашуви тафсилотлари очиқланди

Россия президенти Владимир Путин мамлакатнинг йирик бизнесменлари билан ёпиқ учрашувда бюджетга ихтиёрий бадаллар тўлашни таклиф қилмаган, аммо бу ғояни қўллаб-қувватлаган. Бу ҳақда 27 март, жума куни президент матбуот котиби Дмитрий Песков The Bell нашрида эълон қилинган тегишли маълумотга изоҳ берар экан, маълум қилди.

Давлат раҳбари вакилининг сўзларига кўра, ОАВда бу таклифни “Роснефть” бошқаруви раиси Игор Сечин илгари сургани, шунингдек учрашувда уруш учун маблағ ажратиш масаласи муҳокама қилингани ҳақидаги хабарлар тўғри эмас.

“Ҳақиқат шундаки, учрашув иштирокчиларидан бири ҳақиқатан ҳам давлат учун муайян йирик, жуда йирик пул маблағини ажратишни зарур деб ҳисоблашини айтди ва бу унинг оилавий қарори эди”, — деди Песков журналистлар билан суҳбатда.

Президент матбуот котибининг айтишича, бизнесмен бу қадамни шундай изоҳлаган: “учрашув иштирокчиларининг мутлақ кўпчилиги ўз бизнесини айнан 90-йилларда бошлаган ва, албатта, бу бошланиш асосан қандайдир тарзда давлат билан боғлиқ бўлган”.

“Кўплар бундай бадалларни тўлашни ўз бурчи деб билади”, — деди Песков. Унинг қўшимча қилишича, Путин “бундай ташаббусни олқишлаган”.

26 март куни Россия саноатчилар ва тадбиркорлар иттифоқи қурултойидан сўнг, унда Путин ҳам нутқ сўзлаганидан кейин, Россия президенти мамлакатнинг йирик бизнесменлари билан ёпиқ учрашув ўтказди. The Bell манбаларига кўра, бу учрашувда давлат раҳбари Украинадаги уруш давомида Донецк вилоятининг маъмурий чегараларигача чиқиш режалари ҳақида гапирган ва шундан кейин бюджетга ихтиёрий бадаллар тўлашни таклиф қилган.

Нашр суҳбатдошларидан бирига кўра, “мамлакат учун оғир даврда бизнесни силкитиш” ғояси Сечинга тегишли бўлган, у буни учрашувдан бир кун олдин Путинга йўллаган мактубида баён қилган. Айтилишича, мактубда маблағ жалб қилиш механизми сифатида ҳарбий облигацияларни жойлаштириш таклиф этилган.

Учрашувнинг ўзидаёқ бу чақириққа бир неча бизнесмен жавоб қайтарган. Масалан, тадбиркор ва Доғистондан Федерация кенгаши аъзоси Сулеймон Керимов 100 миллиард рубл ажратишга ваъда берган, деб кўрсатади The Bell манбалари. The Financial Times британ нашри манбаларига таяниб хабар беришича, Путин таклифига жавоб қайтарган яна бир бизнесмен металлургия магнати Олег Дерипаска бўлган.

Нашр шунингдек The Bell суҳбатдошларининг Путин учрашувда Украинадаги урушни Донецк вилоятининг маъмурий чегараларига чиққунга қадар давом эттириш нияти борлигини айтгани ҳақидаги маълумотини ҳам тасдиқлади.

Путин билан бизнесменлар ўртасидаги ёпиқ учрашувга Дерипаска ҳам изоҳ берди.

“Бизга барчамизга бир хил натижа керак — иқтисодий ўсиш суръатларини тиклаш. Президент айнан шу масалага жуда катта эътибор қаратди — ташқи бозорлардаги ўзгарган вазиятни ҳисобга олган ҳолда қандай чекловлар бор, қандай муаммолар бор, қандай истиқболлар бор”, — деди миллиардер “Биринчи канал” билан суҳбатда.