“Техпаспорт”ни ҳар 5 йилда янгилаш талаби киритилди

Фото: ЙҲХББ

Ўзбекистонда автомототранспорт воситасини рўйхатдан ўтказиш ҳақидаги гувоҳнома энди 5 йил муддатга берилади. Бу – 30 март куни имзоланган ҳукумат қарорида кўзда тутилган.

Маълумот учун, амалдаги “техпаспорт”ларда берилган санаси кўрсатилган, лекин амал қилиш муддати кўрсатилмаган.

Автомобилларни қайта рўйхатдан ўтказишда БҲМнинг 10 фоизи (ҳозирда 41 200 сўм) миқдорида тўлов ундирилади.

“Техпаспорт” учун тўловнинг ўзгариш тарихи

Ўзбекистонда 2024 йил 1 апрелга қадар автотранспорт воситаларини рўйхатдан ўтказиш ва қайта рўйхатдан ўтказиш тўлови базавий ҳисоблаш миқдорининг 10 фоизи бўлган.

Ички ишлар вазири 2024 йил 30 март куни имзолаган буйруқ билан, 2024 йил 1 апрелдан эътиборан бу ставка 68 баробаргача оширилган: электромобиллар, мотоцикллар ва тиркамаларни рўйхатдан ўтказиш ва қайта рўйхатдан ўтказиш учун БҲМнинг 1,5 баробари, қолган барча автотранспорт воситалари учун эса БҲМнинг 6,84 баробари деб белгиланган.

2024 йил 2 май куни ички ишлар вазири яна битта буйруқ имзолаб, автотранспорт воситалари, электромобиллар, мотоцикллар ва тиркамаларни қайта рўйхатдан ўтказиш тўловини аввалги даражасига қайтарган: БҲМнинг 10 фоизи деб белгиланган. Рўйхатдан ўтказиш тўлови эса (аксарият автомобиллар учун 6,84 БҲМ, электромобил ва мотоцикллар учун 1,5 БҲМ) оширилганича қолган.