WSJ: БАА Ҳўрмуз бўғозини куч билан очишга тайёр

АҚШ ва унинг иттифоқчилари Ҳўрмуз бўғозини куч ишлатиш орқали очишга қарор қилса, Бирлашган Араб Амирликлари бундай амалиётга қўшилишга тайёр. Бу ҳақда The Wall Street Journal нашри манбага таяниб хабар тарқатди. 

Қайд этилишича, бу ҳолатда БАА Форс кўрфазининг Эронга қарши ҳарбий ҳаракатларнинг тўғридан тўғри иштирокчисига айланган илк давлати бўлади. 

Нашр суҳбатдошларига кўра, ҳозирда БАА БМТ Хавфсизлик кенгашининг Ҳўрмуз бўғозини очиш учун куч ишлатишга рухсат берувчи резолюцияси қабул қилинишида лоббистлик қилмоқда. БАА дипломатлари АҚШни, шунингдек, Европа ва Осиё давлатларини бўғозни куч билан очиш билан шуғулланадиган коалиция тузишга чақирди.

WSJ манбалари БАА АҚШдан Ҳўрмуз бўғозидаги оролларни, жумладан, Эрон назоратида бўлган ва Амирликлар ўзиники эканини даъво қилувчи Абу Мусо оролини эгаллаб олишга ундаётганини маълум қилган.

Эрон Ҳўрмуз бўғозини Яқин Шарқдаги урушнинг илк кунларидаёқ блоклаб қўйганди. Урушга қадар жаҳон бўйлаб денгиз орқали экспорт қилинадиган нефтнинг бешдан бир қисми – кунига 20 миллион баррел нефт, шунингдек, суюлтирилган табиий газнинг катта қисми бўғоз орқали олиб ўтилган. Бўғоз тўсиб қўйилиши нефт нархи кескин кўтарилишига олиб келди. Март ойи охирида Эрон бўғоздан ўтувчи кемалардан тўлов ундиришини эълон қилди.

WSJ маълумотига кўра, АҚШ президенти Доналд Трамп ёрдамчиларига Эронга қарши урушни Ҳўрмуз бўғози очилмаган тақдирда ҳам якунлаш ниятида эканини билдирган. Нашр суҳбатдошларига кўра, Вашингтон бўғозни очиш масаласини Европа ҳамда Форс кўрфазидаги иттифоқчиларига қолдирмоқчи.