Россия бензин экспортини июл охиригача тўхтатди

Россия бензин экспортига вақтинчалик тақиқ жорий қилди, у июл ойи охиригача амал қилади. Тақиқ қишлоқ хўжалиги экиш мавсумида талабнинг мавсумий ўсиши ва жаҳон нефт нархларининг кўтарилиши шароитида киритилди.

Фото: AP

Россия ҳукумати 2 апрел, пайшанба куни мамлакат бензин экспортини июл ойи охиригача тақиқлаганини маълум қилди. Ҳукуматга кўра, ушбу чора ички бозорни барқарорлаштиришга қаратилган, чунки қишлоқ хўжалиги экиш даврида ёнилғига талаб анъанавий тарзда юқори бўлади. Бундан ташқари, Россия ҳукумати жаҳонда нефт нархлари ўсиб бораётганини ҳам сабаб сифатида келтирган.

Москва бензин ва дизел ёнилғисини четга чиқаришга доир чекловларни аввал ҳам бир неча бор жорий этган — бу ички бозорда нархлар ўсишини жиловлаш ва тақчилликнинг олдини олиш учун қилинган. 2025 йилда мамлакатнинг қатор ҳудудларида, шунингдек, Россия томонидан босиб олинган Украина ҳудудларида ёнилғи танқислиги кузатилган. Бунга Украина Қуролли кучларининг Россия нефтни қайта ишлаш заводларига берган зарбалари ва мавсумий талабнинг ортиши сабаб бўлган.

Ҳозирги тақиқ Россия ёнилғи етказиб бериш бўйича ҳукуматлараро келишув тузган давлатларга татбиқ этилмайди, масалан, Мўғулистонга. Соҳа манбалари маълумотига кўра, ўтган йили Россия қарийб 5 миллион тонна бензин экспорт қилган.