Трамп: «Биз жангдамиз. Болалар ва қарияларга вақт йўқ»

АҚШ президенти Доналд Трамп федерал ҳукумат соғлиқни сақлаш соҳаси ва болалар боғчаларига эмас, мудофаани молиялаштиришга кўпроқ эътибор қаратиши кераклиги, қолган ишлар билан штатлар расмийлари шуғулланиши лозимлигини айтди, деб хабар берди 2 апрел куни CNN нашри.

Трамп бу ҳақда 1 апрел куни Пасха байрами муносабати билан ташкил этилган ёпиқ тушлик вақтида гапирган. Унинг бу сўзлари акс этган видеоёзув Оқ уйнинг ютуб-каналига қўйилганди, бироз ўтиб уни ўчириб юборишди, аммо роликни Business Insider журналисти кўчириб олган.

Ўз чиқиши вақтида Трамп Маъмурий-бюджет бошқармаси бошлиғи Рассел Воут билан суҳбатини эслаган: «Мен Расселга болалар боғчаларига пул ажратмасликни, чунки Қўшма Штатлар ҳозир болалар боғчалари билан шуғуллана олмаслигини айтдим. Бу штатлар ваколатида бўлиши керак. Биз болалар боғчалари билан шуғуллана олмаймиз. Биз – катта мамлакатмиз. Бизда 50 та штат бор. Бизда бошқа одамлар ҳам жуда кўп».

Шундан кейин у дарҳол шундай қўшимча қилган: «Биз жанг қиляпмиз. Болалар боғчасига вақт йўқ». АҚШ президенти фикрича, болалар боғчалари ва соғлиқни сақлаш соҳасини молиялаштириш учун штатлар солиқларни ошириши керак.

«Биз болалар боғчалари, Medicaid, Medicare – буларнинг барчаси билан шуғуллана олмаймиз, буни штатлар қила олади. Федерал даражада бунинг иложи йўқ. Биз бир иш билан шуғулланишимиз керак: ҳарбий мудофаа билан. Биз мамлакатни ҳимоя қилишимиз керак. Аммо бу майда-чуйдалар, содир бўлган барча майда-чуйда найранглар билан штатларнинг ўзи шуғулланишига йўл қўйишингиз керак, Рассел», деган Трамп.

Оқ уй матбуот котиби Кэролайн Ливитт 2 апрел куни Трамп ўз нутқида «сайланган демократик амалдорлар йўл қўйган ушбу муҳим дастурларда фирибгарликка чек қўйиш ва миллиардлаб фирибгарлик ишларининг илдизини қуритиш муҳимлиги ҳақида гапиргани»ни айтганди.

CNN қайд этишича, Трамп чиндан ҳам фирибгарлик ҳақида гапирган, лекин биринчи навбатда унинг нутқи тиббий дастурлар учун ким тўлаши кераклиги ҳақида бўлган.

Доналд Трампнинг бу сўзлари Эрон билан уруш бўйича миллатга қилган мурожаатидан бир неча соат олдин айтилган. У ўз мурожаатида АҚШ ғалаба қозонишга яқин турганини таъкидлади, аммо уруш қачон тугашини айтмади.