The Times: Мужтаба Хоминаий ҳушсиз ҳолатда қолмоқда

Эроннинг янги олий раҳбари Мужтаба Хоминаий ҳушсиз ҳолатда ва Қум шаҳрида даволанмоқда, деб ёзмоқда The Times нашри Америка ва Исроил разведкаси маълумотларига таяниб.

«Мужтаба Хоминаий Қумда оғир аҳволда даволанмоқда, у режим томонидан қандайдир қарорлар қабул қилинишида иштирок эта олмайди», – дейилади АҚШнинг Форс кўрфази мамлакатларидаги иттифоқчилари томонидан етказилган дипломатик номада.

Қум шаҳри мамлакат марказида, пойтахт Теҳрондан тахминан 140 километр жанубда жойлашган. Ушбу шаҳар шиаларнинг муқаддас қадамжоси саналади – ва Эроннинг олдинги диний раҳбари, 28 феврал кунги авиазарба оқибатида ҳалок бўлган Али Хоминаийни ҳам айнан шу ерга дафн этиш режалаштирилган. The Times қайд этишича, ҳозирда Қумда унинг жасади учун мақбара қурилмоқда.

Эрон ҳукумати Али Хоминаийнинг дафн маросимини «одам жуда кўп тўпланиши кутилаётгани» муносабати билан ортга сурган, аммо бу кечиктириш «саволлар туғдиради», чунки шиалар анъанасига кўра марҳумни дарҳол кўмиш керак бўлади, дея қайд этган The Times. 8 апрел куни Хоминаий вафот этганига 40 кун бўлади – бу шиалардаги анъанавий мотам даври тугашини англатади.

Мужтаба Хоминаий АҚШ ва Исроилнинг Эронга илк зарбалари берилган вақтда, 28 феврал куни яраланган, у билан бир жойда бўлган отаси Али Хоминаий эса ҳалок бўлган. 7 март куни Исроилдаги нашрлар ўз манбаларига таяниб кичик Хоминаий ярадор эканини хабар қилди. Кейинроқ The New York Times нашри Мужтаба Хоминаий оёғидан яралангани ҳақида ёзди. Бир неча кун ўтиб эса Эрон ташқи ишлар вазирлиги расмийси Мужтаба Хоминаий яраланганини тасдиқлади, аммо у «ўзини яхши ҳис қилаётгани»ни таъкидлади. Март ойи бошида Эроннинг янги диний раҳнамоси этиб тайинланганидан кейин ҳам Мужтаба Хоминаий бирор марта жамоатчиликка кўриниш бермади.