Эрон сулҳдан кейин яна Ҳўрмуз бўғозини ёпди

Эрон давлат телерадиокомпанияси хабар беришича, Вашингтон ва Теҳрон икки ҳафталик ўт очишни тўхтатиш эълон қилганидан кейин биринчи кема Ҳўрмуз бўғози орқали ўтган. Таъкидланишича, кема бўғоздан ўтиш учун Эрондан рухсат олган.

Пентагон раҳбари Пит Ҳегсет ҳам бошқармадаги матбуот анжумани чоғида Ҳўрмуз бўғози кемалар ўтиши учун очиқ эканини айтди. Унинг сўзларига кўра, Эрон кемаларга бўғоз орқали ўтишга рухсат берди.

«Эришилган келишувлар ва берилган баёнотларга кўра, бўғоз очиқ. Ҳарбийларимиз кузатмоқда, албатта, уларнинг ҳарбийлари ҳам кузатмоқда, аммо савдо кемалари қатнови давом этади», деди Ҳегсет журналистларга.

Вазирнинг сўзларига кўра, АҚШ ҳарбийлари Эрон ўт очишни тўхтатишга риоя қилаётганига ишонч ҳосил қилиш учун Яқин Шарққа «яқин жойларда қолади».

Шу билан бирга, Reuters манбаларининг таъкидлашича, бўғоз ҳалигача амалда ёпиқ. Уларнинг сўзларига кўра, Форс кўрфазидаги бир нечта кемалар Эрон ҳарбий-денгиз кучларидан Ҳўрмуз бўғози ёпиқлигича қолаётгани ҳақида хабар олган. Шу билан бирга, Эрон томони рухсатсиз ўтишга уринган кемаларни йўқ қилиш билан таҳдид этгани айтилмоқда.

Кейинроқ Эроннинг Fars агентлиги Исроилнинг Ливанга зарбалари фонида Ҳўрмуз бўғози орқали танкерлар ҳаракати тўхтатилгани ҳақида хабар берди.

Эроннинг юқори мартабали амалдори Reuters агентлигига Эрон Покистондаги Америка ва Эрон расмийлари ўртасидаги музокаралар арафасида, 9 ёки 10 апрелда Ҳурмуз бўғозини чекланган ва назорат остидаги режимда очиши мумкинлигини айтди. Кемачилик компаниялари, ўз навбатида, денгизга чиқишдан олдин уларга қўшимча хавфсизлик кафолатлари кераклигини маълум қилди.

Февраль ойи охирида АҚШ ва Исроилнинг Эрон билан уруши бошланишидан олдин дунё нефть таъминотининг 1/5 қисми Ҳўрмуз бўғози орқали ўтган. Ҳарбий ҳаракатлар бошланганидан кейин Эрон бўғозни тўсиб қўйди.

8 апрелга ўтар кечаси АҚШ ва Эрон икки ҳафталик ўт очишни тўхтатишга келишиб олди. Америка Қўшма Штатлари раҳбари Доналд Трамп Вашингтон Ҳўрмуз бўғози зудлик билан очилиши шарти билан Эронни бомбардимон қилишни икки ҳафтага тўхтатишини айтган эди.

Исроил сулҳни қўллаб-қувватлади, бироқ иккинчи фронт очилган Ливанга ўт очишни тўхтатиш бўйича келишувлар татбиқ этилмаслигини маълум қилди. 8 апрель куни Исроил Яқин Шарқдаги уруш бошланганидан бери Ливанга «энг катта зарба» берганини эълон қилди.