Мелания Трамп Эпштейн билан деярли таниш бўлмаганини айтди

АҚШнинг биринчи хоними Мелания Трамп пайшанба куни Оқ уйда журналистлар қаршисига чиқиб, гўёки уни бўлажак турмуш ўртоғи Доналд Трамп билан айнан Эпштейн таништиргани ҳақидаги миш-мишлар – унинг обрўсини тўкишга қаратилган ғаразли уринишлар эканини айтди.

Бундан ташқари, Мелания Трамп Конгрессда Эпштейн томонидан жинсий эксплуатация қурбони бўлганлар иштирокида тингловлар ўтказишга чақирган.

Мелания Трамп нега айнан шундай чиқиш қилгани маълум эмас. Биринчи ледининг идораси журналистларни тайёрланаётган баёнот ҳақида олдиндан хабардор қилмаган.

Мелания Трамп Эпштейн билан деярли таниш бўлмагани ва у билан йўллари фақат 2000 йилда қисқа муддатга кесишгани ҳақида гапирган. 

Мелания Трампнинг айтишича, у Доналд Трамп билан 1998 йилда Ню-Йоркдаги кечки зиёфатлардан бирида танишган, Эпштейн билан эса фақат икки йил ўтиб, бошқа бир зиёфатда кўришган, у ўша ерга Трамп билан борганди.

У шунингдек Эпштейннинг жинсий эксплуатацияси қурбонларидан бири эмаслигини ва унинг қизиқишлари ҳақида ҳеч нарса билмаганини айтган.

«Мен Эпштейн ўз қурбонлари билан қандай муносабат қилиши ҳақида ҳеч нарса билмаганман. Мен бунга ҳеч қанақасига алоқадор бўлмаганман. Мен бунда иштирок этмаганман», – дейди у.

Мелания Трамп «ўзини шармандали Жеффри Эпштейнга боғлайдиган ёлғонларни бугуноқ тўхтатиш»ни талаб қилган ва бундай ёлғонларни тарқатувчиларни «ахлоқий принциплар, хокисорлик ва ҳурматдан маҳрум бўлган ғаразли кимсалар» деб атаган.

Мелания Трамп жамоатчилик қаршисида камдан кам кўриниш беради ва Оқ уйда деярли чиқишлар қилмайди. Унинг пайшанба кунги баёноти турмуш ўртоғи Оқ уйга қайтганидан кейин ўзини нуфузли, шу билан бирга, ёпиқ шахс сифатида тутаётган биринчи хонимнинг иш графигидаги кам учровчи тадбирлардан бири бўлди.

Доналд Трамп ҳам мухбирларга берган изоҳида рафиқаси Эпштейн билан таниш бўлмаганини маълум қилган. 

Унинг ўзи қайсидир муддат давомида Эпштейн билан алоқа қилгани, аммо унинг қилмишларидан хабар топгач, уни ўз қароргоҳидан қувиб юборганини айтган.

Трампнинг исми «Эпштейн файллари»да кўп марта тилга олинган, аммо уларда Трамп қандайдир ғайриқонуний ишларни содир этгани бўйича гувоҳликлар йўқ.