WSJ: Саудия АҚШдан Эрон билан музокараларга қайтишни талаб қилмоқда

Саудия Арабистони Эрон портларини қамал қилишни тўхтатиши ва Теҳрон билан музокараларга қайтиши учун АҚШга босим қилмоқда, деб ёзади The Wall Street Journal манбаларига таяниб.

Газета суҳбатдошларига кўра, Ар-Риёддагилар АҚШнинг денгиз блокадаси Эронни вазиятни кескинлаштиришга ҳамда нефт экспортидаги яна бир муҳим йўналиш ҳисобланган Боб-ал-Мандиб бўғозини ёпишга ундашидан хавфсирамоқда.

The Wall Street Journal қайд этишича, Саудия Арабистони Ҳўрмуз бўғози ёпилгач, хом нефтни Қизил денгиз орқали ташишга ўтган ва сўнгги кунларда нефт экспорти ҳажмини урушдан олдинги даражага қайтарган.

Боб ал-Мандиб бўғози соҳилларининг катта қисмини эса Эроннинг иттифоқчилари бўлган Яман ҳусийчилари назорат қилади, улар бу йўналишни тўсиб қўйиши мумкин.

The Wall Street Journal нашрининг Саудия энергетика секторидаги манбаларига кўра, Ар-Риёд ҳусийчилардан қироллик кемаларига ҳужум қилинмаслиги бўйича кафолат олган. Аммо Саудия Арабистони АҚШга вазият беқарорлигича қолаётгани ва агар Эрон босимни кучайтирадиган бўлса, ҳусийчилар можарога фаоллик билан аралашиши мумкинлигини билдирган. Арабистонлик мулозимларга кўра, ҳусийчилар ҳам бўғоз орқали ўтадиган кемалардан тўлов ундиришни бошлаши мумкин.

Reuters агентлиги манбалари АҚШ ва Эрон делегациялари жорий ҳафта охирида музокараларнинг навбатдаги босқичи учун Исломободга қайтиб келиши мумкинлигини хабар қилишган.

Яқин Шарқдаги катта урушга қадар нефт экспортидаги асосий йўналишлардан бири бўлган Ҳўрмуз бўғози урушнинг илк кунларидаёқ Эрон томонидан тўсиб қўйилди. Ундан фақат Теҳронга «дўст» бўлган давлатларнинг кемалари ўтишига рухсат берилмоқда, Ислом инқилоби муҳофизлари корпуси эса бўғоздан ўтиш учун тўлов жорий қилган.

АҚШ ва Эрон ўртасида 11-12 апрел кунлари Исломободда ўтказилган музокаралар натижасиз якунланганидан кейин Доналд Трамп америкалик ҳарбийлар «Ҳўрмуз бўғозига киришга ва ундан чиқишга уринган ҳар қандай кеманинг йўли тўсилиши»ни маълум қилди. Кейинроқ АҚШ қуролли кучлари марказий қўмондонлиги аниқлик киритиб, фақат Эрон портларига бораётган кемалар блокланишини маълум қилди. Ҳўрмуз бўғози орқали ҳаракатланувчи ва бошқа мамлакатлардаги портларга борувчи кемалар ҳаракати эса чекланмаган.