Зеленский: Эрондаги уруш сабаб АҚШнинг Украинага вақти йўқ

АҚШ ва Исроилнинг Эронга қарши давом этаётган уруши сабаб Вашингтоннинг “Украинага вақти йўқ”. Украина президенти Володимир Зеленский Германиянинг ZDF телеканалига берган интервьюсида ана шундай эътироз билдирди. Интервью 14 апрель, сешанба куни эълон қилинди.

“Улар (Украинада тинчлик йўли билан ҳал этиш бўйича музокараларда Америка томонидан қатнашувчилар — Жаред Кушнер ва Стив Уиткофф) доим Эрон билан алоқада, аммо Украинага вақтлари йўқ”, — деди Зеленский бошловчи Майбрит Иллнер билан суҳбатда.

Интервью давомида Украина раҳбари нима учун унинг фикрича, Эрондаги уруш Киев учун салбий оқибатларга олиб келаётганини тушунтирди: “Агар бу уруш чўзилса, Украина учун қурол-яроғ камаяди”.

Шу билан бирга, у, жумладан, Украина Қуролли кучларида ҳаво мудофаасини таъминлаш учун Patriot тизимлари етишмаётганини қайд этди. “Ҳозир бизда (Patriot зенит-ракета мажмуалари бўйича) шундай танқислик борки, бундан ортиқ ёмони бўлиши мумкин эмас”, — деди Зеленский.

Айни вақтда у Украина Ҳўрмуз бўғозини блокададан чиқаришга ёрдам беришга тайёр эканини билдирди, аммо АҚШ бу масалада ҳали Киевга мурожаат қилмаган.

1 апрель куни АҚШ президенти Дональд Трамп Британиянинг The Telegraph газетасига берган интервьюсида, Ҳўрмуз бўғозини блокададан чиқариш операциясида нафақат АҚШнинг НАТО бўйича иттифоқчилари, балки Украина ҳам иштирок этиши керак эди, деган фикрни билдирган эди.

“Автоматик тарзда улар у ерда бўлмади, Украина ҳам шулар жумласидан. Украина бизнинг муаммо эмас эди. Бу синов эди, биз уларга ёрдам бердик ва доим ёрдам берган бўлардик. Аммо улар бизга ёрдам бермади”, — деган эди ўшанда АҚШ президенти.

Бундан ташқари, Володимир Зеленский ZDF’га берган интервьюсида Германия ва Германия канцлери Фридрих Мерцни Киевни фаол қўллаб-қувватлаётгани учун мақтади.

“Европадаги энг йирик стратегик шерик (Украина учун) — бу, албатта, Германия”, — деди Украина президенти ва Германия унинг мамлакатига АҚШдан кўра кўпроқ ёрдам бераётганини қўшимча қилди.

Аввалроқ Зеленский Германия-Украина ҳукуматлараро маслаҳатлашувлари доирасида Берлинда Мерц билан учрашган эди. Ушбу тадбир давомида Германия канцлери ва Украина президенти стратегик шериклик тўғрисидаги келишув ҳамда қатор соҳаларда ҳамкорлик қилиш бўйича шартномаларни имзолади.

Мерцнинг сўзларига кўра, Украинага янада кенг қамровли ёрдам кўрсатиш чоралари ҳам келишиб олинган. Улар ҳаво мудофааси, узоқ масофали қуроллар, дронлар ва артиллерия ўқ-дорилари соҳасидаги ёрдамни ўз ичига олади.

Бундан ташқари, янги қурол тизимларини ишлаб чиқиш учун рақамли маълумотлар алмашинуви ҳам ташкил этилади, деди Германия ҳукумати раҳбари.

ZDF’га берган интервьюсида Зеленский яна бир бор Украина Европа Иттифоқига қўшилишга интилаётганини таъкидлади.

“Украина учун ЕИ аъзоси бўлиш муҳим. Бу Европа Иттифоқининг ҳам истаги бўлиши керак, — деб ҳисоблайди у. — Бизнинг армиямиз ва технологияларимиз ЕИни фақат кучайтиради”.

Шу билан бирга, у Украинанинг НАТОга қўшилиш эҳтимолини пастроқ деб баҳолади, жумладан, унинг фикрича, бунга АҚШ қарши чиқиши мумкин.

Фридрих Мерцнинг чақирув ёшидаги эркаклар Украинада қолиши, Германияга чиқиб кетмаслиги кераклиги ҳақидаги талаби ҳақида фикр билдирган Украина раҳбари: “Мен одамларнинг эркин ҳаракатланишини тақиқлай олмайман”, — деди.

Шу билан бирга, Зеленский “Фридрих нима деяётганини эшитяпман”, деб қўшимча қилди ва украиналик эркакларнинг Германияга оммавий кўчиб ўтиши мамлакат бюджетига катта юк тушираётганини тушунишини тан олди.