Эрон Ҳўрмуз бўғозини барча савдо кемалари учун очганини эълон қилди

Кемалар олдиндан «келишилган йўналиш бўйича» ҳаракатланиши мумкинлиги таъкидланмоқда. Нефт нархи бир баррел учун 90 долларгача пасайди..

Фото: AFP/Getty Images

Эрон ўт очишни тўхтатиш муддати тугагунига қадар Ҳўрмуз бўғозини барча тижорат кемалари учун очди, деди мамлакат ташқи ишлар вазири Аббос Ароқчи.

«Ливандаги ўт очишни тўхтатиш режимига мувофиқ, Ҳўрмуз бўғози орқали барча тижорат кемаларининг ўтиши сулҳнинг қолган даврида тўлиқ очиқ деб эълон қилинади», деб ёзди у Х ижтимоий тармоғида.

Вазир сўзларига кўра, кемалар «келишилган йўналиш бўйича» ҳаракатланиши мумкин, бу ҳақда аввалроқ Эрон портлари ва денгиз транспорти ташкилоти хабар берган эди.

Эрон АҚШ ва Исроил томонидан бошланган урушнинг илк кунидаёқ (28 февраль) Ҳўрмуз бўғозини ёпгани ҳақида эълон қилган ва рухсатсиз ҳаракатланган танкерларни дронлар ва ракеталар билан ўққа тутишга киришган. Уруш бошидан буён бундай ҳужумлар билан боғлиқ кўплаб ҳолат қайд этилган, кемаларга ҳужумлар 8 апрел куни эълон қилинган вақтинчалик сулҳ даврида ҳам давом этган эди.

Ароқчининг баёнотидан кейин Brent маркали нефт нархи бир баррел учун 89,55 долларгача пасайди. Бу эса бир кун олдингига қараганда қарийб 10 фоизга арзонроқ.

Тайёрлаган Сардор Юсупов

#Эрон #Ҳўрмуз бўғози

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.