«Танқидлар ўринли». Кудбиев қимматбаҳо соати юзасидан изоҳ берди

Урбанизация ва уй-жой бозорини барқарор ривожлантириш миллий қўмитаси раиси Шерзод Кудбиев тадбиркорлар билан мулоқот чоғида қимматбаҳо соатда кўриниш бериши ортидан бошланган муҳокамаларга муносабат билдирди.

Ижтимоий тармоқ фойдаланувчилари бу соат люкс модел (тахминларга кўра Vacheron Constantin Overseas ёки Breguet Marine) эканини ва нархи 50 минг доллар туришини тахмин қилишган. 

Хусусан, журналист Илёс Сафаров амалдорларнинг мол-мулкига жамоатчилик эътибори қаратилиши демократик давлат учун нормал ҳолат эканини таъкидлаган. У бундай вазиятларда давлат хизматчиларининг сукут сақлаши ҳокимиятга бўлган ишончсизликни фақат кучайтиришини қайд этган.

Шу билан бирга, соат Кудбиевнинг 2024 йил декабр ойида вафот этган отаси Давлат Кудбиевдан қолган мерос экани ҳам тахмин қилинган.

19 апрел куни Шерзод Кудбиев видеомурожаат эълон қилди ва унда ўз изоҳининг кечикиши иш ҳажми кўплиги ҳамда «стресс» билан боғлиқлигини айтиб ўтди.

«Илёс акам Сафаров бир пост чиқарибдилар – таҳлил, танқид. Лекин, фикримча, жуда ўринли бўлган… Биринчи навбатда, тўғри, бу соат менга жуда қадрли соат, кўп нарсани эслатади. Лекин қандай бўлишидан қатъи назар, давлат хизматчиси, авваламбор, камтар бўлиши керак», – дейди у.

Кудбиев амалдорлар оммавий тадбирлар ва йиғилишларда касбий этикага қатъий амал қилиши зарурлиги ҳақидаги фикрга қўшилган ҳамда бўлган воқеадан сабоқ чиқарганини тан олган.

«Шунинг учун, айниқса, йиғилишларда, мана шундай учрашувларда касбий этикага қатъий риоя қилиб, авваламбор, камтарлик билан ўзининг хизматчи бўлганини яна бир бор кўрсатиб бориши керак деб ўйлайман. Бу менга шахсан катта хулоса бўлди ва келгусида фақат шу яхшилик йўлида, ватанимиз равнақи йўлида ишлаймиз деган ва мана шунга амал қиламиз деган фикрдаман. Катта раҳмат ҳаммага», – дея хулоса қилди у.