Ризо Паҳлавий Берлинда ҳужумга учради

Эроннинг сўнгги шоҳи ўғли ва мухолифатнинг кўзга кўринган вакилларидан бири Ризо Паҳлавийга 23 апрель, пайшанба куни Берлиннинг ҳукумат кварталида қизил суюқлик сепилди.

Сиёсатчи Федерал матбуот анжумани биносидан кўчага чиққан пайтда унинг ортидан бир эркак яқинлашиб, елкасига суюқлик сепган. Шундан сўнг ҳужум қилган шахс ерга ётқизилиб, полиция томонидан қўлга олинган. Унинг мақсадлари ҳақида маълумот берилмаган.

Ҳужумдан кейин Ризо Паҳлавий матбуот хизматининг X ижтимоий тармоғидаги саҳифасида сиёсатчи ҳодиса оқибатида жабрланмагани ва Берлиндаги дастурини ўзгаришсиз давом эттиргани ҳақида хабар берилди.

Қайд этилишича, у Бундестаг ташқи ишлар қўмитаси раиси билан учрашган, Бундестагдаги партиялараро парламент давра суҳбатида иштирок этган, минглаб эронликлар йиғилган митингда нутқ сўзлаган, ёш депутатлар гуруҳи билан учрашган, ОАВга бир нечта интервью берган ҳамда Эрон диаспораси вакиллари билан мулоқот қилган.

Шоҳ ўғли эътибор “ҳар куни қатллар, қотилликлар, қийноқлар ва зўравонликларга дуч келаётган Эрон халқининг оғир аҳволи”га қаратилишини исташини билдирган. Унинг вакиллари Паҳлавий Берлин полициясига қўллаб-қувватлов учун миннатдорлик билдиришини ҳам қўшимча қилган.

Германия пойтахтидаги матбуот анжуманида Ризо Паҳлавий, жумладан, Европа давлатлари ҳукуматларини Эрон режимига ён бермасликка чақирди.

“Агар сиз бу режим билан тинчликка эриша оламиз, деб ўйласангиз, қаттиқ адашасиз. <...> Бу тизим қисқартирилган шаклда сақланиб қолган тақдирда ҳам барқарорлик ҳеч қачон бўлмайди”, — деди у.

Унинг сўзларига кўра, Европа “барчага хавф солаётган ўлиб бораётган режим” ва “эркин Эрон” ўртасида танлов қаршисида турибди. Теҳрондаги ҳокимият эса “ҳеч қачон ҳозиргидек мўрт бўлмаган”.

“Эркин дунё нимадир қиладими ёки бу қонли қатлиомни жим кузатиб тураверадими?” — деди Эрон мухолифати етакчиларидан бири, мамлакатда сўнгги икки ҳафта ичида 19 нафар сиёсий маҳбус қатл этилганини тилга олар экан.

“Масала ўзгаришлар бўладими-йўқми, деганида эмас. Ўзгаришлар аллақачон яқинлашмоқда. Асл савол — Ғарб ҳамжамияти шунчаки кузатишда давом этар экан, яна қанча эронлик ҳалок бўлади?” — дея Паҳлавий сўзларини келтирди Reuters агентлиги.